Trahadornan di Serlimar mester a bay den accion Pa haya atencion di Gobierno relaciona cu situacion na dump

For di diabierne ultimo, tabata Edmundo Marlin, Vice Presidente di SEPPA, despues di a reuni cu e trahadornan di Serlimar, a tuma decision pa duna Gobierno 2 x 24 ora pa convoca y como no a bin ningun reaccion, for di ayera madruga, e trahadornan di Serlimar a bay den accion. A dicidi di hiba nan accion te na Bestuurskantoor.

Tabata pa 10 or di mainta, Ministernan Mike de Meza y Benny Sevinger a dicidi di reunion cu e dos sindicatonan, cu tin representacion na Serlimar.

 

Aki por mira cu Gobierno, cu ta co-firmante di un protocol for di december 2016, cu e.o. ta bisa cu cualkier decision cu tuma pa cu futuro di Dump na Parkietenbos, lo envolvi sindicatonan den nan decision.

Esaki no a tuma lugar, pero ultimo dianan por a tende Prome Minister Mike Eman y despues Minister Mike de Meza, cu lo sera e dump aki definitivamente, sin a reuni cu e sindicatonan.

 

Tur esaki a crea un incertidumbre, sigur pa loke t’e futuro di e trahadornan, cu ta di opinion cu nan lo perde nan trabao.

Pesey ayera mainta, despues di bay den accion, e sindicatonan a haya oido di Gobierno, cu inmediatamente a reuni cu e sindicatonan, SEPPA y STA.

 

Na final di e reunion, nos di AWEMainta a papia cu Diego de Cuba, Presidente di STA, kende a bisa cu e reunion a bay den un bon ambiente. Unda, manera e por a compronde, cu prome cu sera dump di Parkietenbos, lo bay na tuma algun decision ainda.

E.o. mayan

Conseho di Minister lo dicidi su lo por cumpra 4 incinerator pa kima sushi, mientras cu lo evalua kico pa haci cu e equipo di Bouldin & Lawson, pa cual Gobierno a paga un dineral y nunca a traha.

Aki tin un basta placa para, y si e machin aki por funciona, pa mula palo etc, crea fluff, mester wak cuanto e lo costa pa dreche. Si e ta costa mas cu un nobo, lo cumpra un nobo.

 

Tambe Diego de Cuba a informa AWEMainta cu lo studia pa muda e dump, p’e no sigui crece, pero tur cos ta indica cu lo bay un poco mas pabao di unda e ta, evitando cu e sero sigui crece.

Puntrando Diego de Cuba, di loke ser kima, e gas cu lo wordo forma, si esaki lo ser bendi cu EcoGas, el a bisa cu esaki no a ser discuti. Esaki no ta importante p’e sindicato.

Importante tabata cu Gobierno a garantiza un biaha mas cu ningun trahador di Serlimar lo haya retiro, con lo bay atende cu e futuro sushinan, pa cual awe Conseho di Minister lo dicidi pa cumpra 4 incinerator pa kima sushi.

Y crea un mihor sistema di seguridad rond di e dump, pa evita hende cu no tin nada di haci, subi riba e dump.

 

Pa SEPPA y STA, e tabata un bon reunion, sperando awe decision di Gobierno riba cumpra di e equiponan pa procesa e futuro sushinan di Aruba y muda e sitio actual, cu sigur lo bira mas pabao di esun actual.

 

Leave a Reply

Top