Treat pa atletanan di Special Olympics

Recientemente atletanan di Special Olympics a ricibi un tempo liber di nan trainingnan intensivo, pa djis relaha y diberti un poco.

E 30 atletanan, famia, miembronan di Special Olympics Aruba, representantenan di Digicel y sponsornan, a reuni na tereno di SVGA pa un anochi di wega y baile, cual lo eleva compañerismo entre miembronan.

 

Digicel como un sostenedor di Special Olympics Aruba pa hopi aña tabatey presente cu algun miembro di nan team p’asina experencia e ambiente agradabel aki.

E actividadnan cu e anochi aki a tabata inclui: Wega di bolas y Badminton, cu un toke special unda atletanan a competi contra nan entrenadonan tambe.

E punto culminante di e anochi aki tabata e competencia di baile, unda cu atletanan a demostra cu nan tin e mesun habilidad riba pista di baile cu nan tin den e diferente disciplinanan deportivo.

 

Arthuro “Tuyo” Werleman, Director di Directiva di Special Olympics Aruba a remarca, “e meta di e actividad tabata pa sigura cu atletanan ta interactua cu otro, como cu durante competencia di “National Games” cu ta wordo teni na diferente parti rond mundo, atletanan no tin e oportunidad pa conecta cu otro y crea amistad na e momento ey.”

 

Marketing & Branding Manager di Digicel, Jennifer Kock, a expresa: “E tipo di actividadnan interactivo asina ta importante, si berdaderamente nos ta traha den direccion di un comunidad uni.

Tabata un placer pa Digicel participa no solamente como un sostenedor di e actividad, pero tambe pa djis relaha y comparti momentonan special cu e atletanan.”

 

Top