Tremendo seminario “Explosion karate”

Recientemente a tuma luga (weekend di 5 y 6 di augustus) den Compleho Deportivo Frans Figaroa e seminario ‘Explosion Karate’ organisa dor di e Asociacion Arubiano di Karate Do Shotokai, dojo Shocokan Karate Do Aruba. Tabata un atardi hopi activo unda diferente scol di karate a participa na e seminario.

 

E seminario mes a wordo duna dor di e instructor di karate “Shihan” Victor Garrido (di 7 dan) di e “Asociación Venezolano de Karate Do Shotokai” y “Federación Internacional Shotokai”.

E tabata un honor pa tin bishita di su persona na Aruba. “Shihan” Victor Garrido a yega Aruba pa asisti na e examennan di Dojo Shocokan Karate-Do Aruba. Tambe pa brinda tur scol di karate e oportunidad pa pasa un weekend activo intercambiando conocemento di karate.

 

Karatekanan di e edad mas hoben a participa den e prome grupo. Nan a haya e oportunidad pa train diferente tecnica basico. Tambe nan a haya diferente tip con pa mehora esakinan. Mas cu claro no por a keda afor e diferente recomendacionnan pa cu e parti di combate.

 

Interesante tabata e entrenamiento p’e instructornan di e diferente scolnan unda cu e condicion fisico tabata e reto mas grandi durante e seminario. Sin embargo, cada un di e instructornan y karatekanan di grado halto a haci nan maximo esfuerso pa demostra nan nivel di karate.

Dojo Shocokan Karate-Do Aruba, bou di guia di e instructor di karate, Sensei Alberto Gonzalez Lujan, ta gradici cada karateka cu a participa na e seminario “Explosion karate”.

 

Un danki ta bay tambe na e team completo di boluntario cu a yuda na e seminario. Na mes momento ta spera di por topa otro pronto na un siguiente evento di karate. Oss!

Leave a Reply

Top