Tres homber a sali trip, pero cu arma di candela y awor ta den problema cu husticia

Diabierna tres homber relativamente hoben a presenta dilanti mesa berde pa acusacionnan relaciona cu arma di candela y menasa.

Ta trata aki di M.R.T. (18); O.A.L.T. (24) y K.K.G. (27). E hombernan aki ta wordo acusa di, conhuntamente cu un otro of otronan di posecion di un revolver y balanan riba 27 di april 2017. Tambe nan ta wordo acusa di a menaza, conhuntamente cu un otro of otronan a menaza un y/of dos persona cu morto riba 27 di april 2017, dor di bisa nan: “No worry, nos ta bin bek pa boso. Mi ta bin tira bo” y/of “Pesey boso ta baya haya bala. Wak pa boso prepara, pasobra bala ta bay coy boso curpa”, y di a tira den direccion di e hendenan aki of los tiro den aire.

 

Den Corte di repente e acusadonan ta bisa di no a expresa e palabranan ey, pero si algun palabra malo na momento cu nan no a wordo permiti pa drenta e club nocturno na Olde Molen.

Y cu e tironan den laira a wordo lansa dor di un homber cu nan conoce como “Parce” (Colombiano) cu e anochi ey tabata pafo di e club.

O.A.L.T. t’esun cu menos tabata sa di lo sucedido pafo di e club, ya cu, segun e ta bisa, e tabata asina burachi y halto cu unabes cu e biento a dal den su cara el a pega soño. Pero e tambe ta bisa cu e tal Parce a subi cu nan den auto.

 

E storia di e trio ta cu despues cu nan no a wordo permiti di drenta e club, nan a rabia y a bay . Pafo nan a topa cu e tal “Parce” y a palabra pa bay San Nicolas.

Segun K.K.G., e momento cu el a cuminsa core el a tende e tironan y su amigo M.R.T. a pensa y a puntra si ta un flat tire nan a haya, y el a saca su cabez pafo pa wak.

 

“Na e momento ey Parce a bisami, sigui core. No worry, e tiro ta den laira y nan no ta haya e balanan,” segun K.K.G. ta loke e Colombiano a bise.

Pero el a spanta asina hopi cu el a keda core rond y despues a bay cas di su wela, unda cu e ta biba. Ey hunto cu e Colombiano el a core sconde den mondi. Pero ora cu el a mira Polis papiando cu su wela, el a sali bey.

 

Fiscal no a kere e asunto aki mucho, y a pidi pa scucha cada un di e acusadonan apart dunando descripcion di nan supuesto amigo Colombiano cu lo a los e tiro cu su arma di candela.

E descripcion cu nan a duna ta corecto pero un “strikvraag” di Fiscal unda e homber tin un tattoo niun no por a contesta.

 

“Nan palabracion di kico pa conta ta hopi amateur y e parti di tattoo nan no a papia riba dje. Nan por a simplemente bisa cu e tin tattoo of no tin,” e Fiscal a comenta despues di interogacion.

P’e representante di Ministerio Publico ta hopi straño cu di repente ta aparece un di 4 persona den e sucedido y niun di nan no sa datonan di dje: Con yame, cuanto aña e tin, unda e ta biba, etc.

E storia cu nan tin miedo pasobra e homber lo a menasa nan ta, ta algo cu Fiscal no ta kere den dje.

 

“Parce no ta existi”. Simplemente, el a bisa, nan kier core pa nan responsabilidad. Den e auto, cu a wordo haya na cas di K.K.G., Polisnan a haya e arma, bala y marihuana.

Representante di Ministerio Publico ta haya cu tur tres ta mes culpabel y castigabel y a pidi un castigo di 18 luna di cual 6 luna ta condicional y 2 aña di prueba.

Dia 17 di november awor lo tin sentencia.

 

Leave a Reply

Top