Tri-atleta elite Renze Postma a sali pa un campo di entrenamento na Bogota, Colombia

Diahuebs ultimo, e hoben tri-atleta Renze Postma a sali pa Bogota, Colombia unda pa 9 siman largo e lo permanence den un campo di entrenamento. Renze lo entrena hunto cu e atletanan elite di Colombia na Bogota.

 

E atleta Postma lo entrena p’asina adapta na e haltura di e ciudad di Bogota pa den e siguiente simannan restante entrena bou guia profesional.

Mester menciona cu despues di e campo di entrenamento na Bogota, e hoben Postma lo biaha pa e ciudad di Salinas, Ecuador unda e lo cuminsa prepara su mes pa e prome competencia oficial internacional di e aña aki, cual lo ta e 2017 Salinas CAMTRI Triathlon American Cup cu lo tuma luga na dicho ciudad.

Na Salinas, Renze lo hiba 1 siman di preparacion pa despues compete contra e mihonan di e continente America. E campo di entrenamento na Colombia lo fungi como un bon preparacion pa e atleta Postma esaki pa cu su competencia den e CAMTRI Series 2017.

 

Tras di tur federacion cu ta cumpli cu e exigencianan stipula pa e Comision di Subsidio tin e ayudo financiero necesario pa por cubri tur e gastonan. Comision di Subsidio y Lotto, e Loteria di Aruba ta kere fielmente den e atleta cu kier yega na un nivel mas halto. P’esey tambe ta duna e deporte tur sorto di sosten conforme cu e normanan stipula.

 

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e tri-atleta Renze Postma pa e campo di entrenamento na Bogota, Colombia.

Top