Tri-atleta Renze Postma lo competi den ultimo ITU U23 Men World Championship na Rotterdam, Hulanda

E ultimo 2 lunanan, e tri-atleta elite Arubano, Renze Postma tabatin un calendario basta ocupa unda el a biaha pa Europa pa entrena y competi tanto na Hungria, Portugal y Hulanda. Despues cu na juni ultimo, el a triunfa pa di 3 aña consecutivo den e Aruba Internacional Triathlon 2017, e atleta Arubano Renze Postma a biaha pa Europa y atende dos campo di entrenamento.

 

E prome tabata na Budapest, Hungria hunto cu e seleccion nacional di triathlon di Hungria, mientras e di dos tabata na Rio Maior, Portugal. Tambe Renze a competi den e mundial di triathlon na Hungria, mientras diabierna awor dia 15 di september e lo finalisa e competencia di  Federacion Mundial di Triathlon, esta ITU ora e competi den e U23 Men World Championship na Rotterdam, Hulanda.

Mester bisa cu Renze Postma ta den e mihor forma cu nunca unda el a mehora su tempo considerabelmente y a mustra un progreso enorme den su deporte.

 

E aña aki so Renze Postma a permanece varios luna den exterior unda el a sigui un entrenamento intensivo na Colombia pa despues competi den e Camtri Series cu a inicia na Salinas, Ecuador. Aki Renze Postma a sobresali y obtene un tremendo resultado kibrando su record personal cu casi 4 minuut.

Na luna di mei, Renze Postma ta gana e prome lugar overall den e Curacao Triathlon International 2017.

Na Hulanda, e atleta Renze Postma ta wordo guia pa coach Nicolaas Robert.

E evento di Federacion Mundial di Triatlon, ITU t’esun di mas grandi na mundo mirando e cantidad grandi di tri-atleta rond mundo cu lo participa n’e evento den e categorianan di elite, sprint, junior, U-23, Paratriatlon y aquathlon.

 

Durante 4 dia largo e mihor tri-atletanan rond mundo lo lucha p’e titulonan maximo di triatlon den e awanan di Rotterdam.

Un danki sigur na Lotto, e Loteria di Aruba pa medio di Comision di Subsidio cu a subsidia e competencia di e tri-atleta Renze Postma pa e ITU U23 Men World Championship na Rotterdam, Hulanda.

 

 

Leave a Reply

Top