Tur cos ta cla pa inauguracion di Plaza Padu Den fin di siman ta transporta e estatua pa Plaza Padu

Gabinete Mike Eman II a percura cu nos Tata di Cultura Padu Lampe ta haya e debido reconocemento na bida, construyendo un Plaza na su nomber, unda cu tin un estatua di dje na piano hunto cu Rufo Wever y Lio Booi, kendenan a contribui na composicion di himno di Aruba.

 

E nomber Juan Chabaya ‘Padu’ Lampe (Padu) siendo un hoben, a expresa su mes politicamente firmando e peticion pa Aruba ta Baas den su propio Cas. E tempo ey no a pensa niun momento cu Padu Lampe lo forma un parti importante di historia di Aruba.

No solamente como firmante di e peticion, pero un composicion original di Padu como musico a wordo adapta hunto cu Rufo Wever, cu un couplet agrega dor di Lio Booi, a bira e himno di pais Aruba. Padu a logra biba tur e momentonan importante aki di pais Aruba.

 

Gobernacion di Gabinete Mike Eman II a tuma e decision pa dedica e plaza nobo patras di e Centro di Gobernacion y den e Centro Historico di Aruba n’e gran yiu di tera Padu Lampe.

A pone e trabou di diseño di e estatua di Padu y e co-autornan di Himno di Aruba den man di e conocido artista Arubiano Ciro Abath.

E plaza ta cla y e estatua ta cla. E fin di siman aki Prome Minister Eman lo ta presente na momento cu transporta e estatua directamente for di Turibana, na Noord, pa Plaza Padu.

 

E evento aki ta bay wordo transmiti en vivo via Facebook. Esaki ta un momento special den historia di Aruba y por logra haci’e na momento cu Tata di nos Cultura, Padu Lampe, ta mey-mey di nos pa experencia esaki.

Pabien Aruba y prepara p’e gran inauguracion di Plaza Padu cu lo tuma lugar riba diabierna, 17 di maart.

E apertura ta inicia pa 6’or di atardi cu un marcha cultural di Plaza Niki Habibe, sigui p’e parti protocolario di apertura riba Plaza Padu, y ta culmina mas den anochi cu un concierto publico riba Plaza Daniel Leo.

 

 

Top