Tur cos ta cla p’e di 37 Fiesta Rotaria 2017 diadomingo awor, 2 di april

Durante un conferencia di prensa diamars atardi, Stanley Looman, Presidente di Rotary Club of Aruba a indica cu tur preparacion ta cla pa Fiesta Rotaria 2017, diadomingo awor, 2 di april 2017.
E portanan lo habri pa 10’or di mainta y e actividad lo termina pa 6’or di atardi. E aña aki tambe Fiesta Rotaria lo tuma lugar n’e parking lot di Stadion Guillermo Trinidad.

Rotary Club of Aruba ta organisa Fiesta Rotaria cu e meta pa recauda fondo pa por continua cu nan servicio comunitario, desaroya proyecto cu tin un impacto positivo den nos comunidad y asisti instancianan cu ta den necesidad.
Wichard van der Meulen, Chairman di Fiesta Rotaria a elabora cu lo bay tin diferente actividad riba e dia aki.

E aña aki Rotary a ricibi un total di 17 containers cu articulonan di cas cu lo wordo bendi na prijsnan hopi atractivo.
Lo tin diferente producto na benta cu prijsnan inigualabel manera comestibles, paña, tela, sapato. Lo tin un tent unda ta bende boeki, joyas y tambe un di mata, producto pa cas manera cama, matras, boxspring, cashi, stoel, verf, tegels y glas.
E famoso kids corner lo tey atrobe y mas amplio aña aki cu e.o. Dino jumps, Caroussel, Trampolin, Popcorn, Ice Cream.

Tambe lo bai tin diferente wega popular pa nos muchanan. Bar y cushina lo ta bon surti cu entre otro 2 food corner cu BBQ y diferente bar tents.
Rotaract Club of Aruba tambe lo tey cu nan tent di cu snacks/sandwiches, refreshments, koffie, batido’s y mucho mas.
Lo bay tin bon ambiente cu entretenimento pa henter famia asina Shelby Maduro, miembro di Rotary Club of Aruba a sigui splica.
E mainta ta cuminsa cu presentacion di Miranda/Mi Amor, show di baile di entre otro Club di Movimiento y Pierewietje y Kibrahacha. Tambe presentacion musical di bandanan local manera Le Groove, Buleria y D’Licious.

Pa 5’or di atardi lo saca e premionan di e rifa cual ya ta bon conoci pa nos comunidad. Pa solamente Afl. 25,- pa ticket bo por gana un di e 12 tremendo premio nan cu como prome premio un Suzuki Gran Vitara nobis nobis.
E bukinan di rifa ainda ta obtenibel serca tur miembro di Rotary.
Presidente Stanley Looman ta invita e comunidad di Aruba pa pasa Fiesta Rotaria y asina aporta na nos communidad.
Rotary Club of Aruba kier a gradici tur hende y compania cu di un of otro manera ta aportando pa haci evento aki algo grandi un biaha mas.

Top