Tur cos ta cla pe wega nobo – Dialuna awor Lotto ta ranca sali cu e wega 1-OFF

Diabierna Lotto a presenta nan wega di loteria nobo, esta 1-OFF. Lotto ta entusiasma pa presenta e wega aki, unda cu comunidad tin mas chens di sigui gana diferente premio.

Tabata ayera mainta na Surfside Marina, Lotto a introduci un wega nobo, unda e Marketing Coordinator Damaris Ridderstap a splica cu ta trata di un wega di 4 cifra, cu ta cay den e famia di weganan manera Catochi, Big 4. Zodiac, pero esaki ta bin net despues di Big 4.

 

E wega di 1-OFF lo hunga tur dia, dialuna pa diasabra, merdia y anochi. Riba diadomingo tin sorteo di merdia so, cu ta tuma lugar pa 2:00PM.

Marketing Coordinator, Damaris Ridderstap a duna di conoce cu e wega di 1-OFF lo tin su propio sorteo y e ta un wega cu e premio no ta acumula.

E volgorde di e sorteo lo ta: Catochi, Big4, sigi pa 1-OFF, Zodiac y su Signo y despues tin, manera semper, e weganan di jackpot.

 

E forma con pa gana cu 1-OFF ta facil, pasobra esun cu cumpra e wega tin te cu 81 chens pa gana. Si e numbernan sali y e cumprador tambe a cumpra e secuencia corecto, e tin e chens di gana 2500 florin, invertiendo 1 florin, cu ta un pida.

Den e caso di 1-OFF tin 80 chens mas pa gana, pasobra e numbernan cu abo a kies por ta un mas, of un menos, cu e numbernan ganado.

Ta importante pa corda cu pa un persona por gana, bo numbernan mester ta den e mesun secuencia cu e numbernan cu a sali ganador durante e sorteo.

Si bo tin 1-OFF (un mas of un menos) riba 1 di bo numbernan y bo a bet 1 florin, bo ta gana Afl. 100,-.  Si bo tin 1-OFF riba 2 di bo numbernan y bo a bet 1 florin, bo ta gana Afl. 25,- Si bo tin 1-OFF riba 3 di bo numbernan y bo a inverti 1 florin, bo ta gana Afl. 15,- y si bo tin riba tur 4 di bo numbernan 1-OFF y bo a inverti 1 florin, bo ta gana Afl. 50,-. Mas bo inverti/bet/cumpra, mas bo ta gana.

 

E sorteo lo cuminsa dialuna 14 di augustus, 2017. Esnan cu ta cumpra e wega por cuminsa cu 50ct (mita pida) y e ta bay te un maximo di 50 florin. Ora cumpra cu 1 florin y bo numbernan sali den cabez bo ta gana 2500 florin.

Si cumpra 50 florin, y bo numbernan sali den cabes, bo ta gana e premio maximo di 125 mil florin. Ta importante pa corda pa un persona por gana, bo numbernan mester ta den secuencia.

 

“E wega ta uno nobo y e ta completamente diferente cu e weganan cu tin n’e momentonan aki”, Sales & Marketing Manager, Patrick Fortin a splica.

“E wega aki ta algo nobo pa atrae hendenan cu semper tabata faya pa 1 number y no tabatin e chens di gana algo. Esaki ta duna nan e chens pa sigui hunga nan number preferi y tob cu chens di gana premio.”

Prensa cu tabata presente a pasa un momento agradabel ora cu nan a haya e oportunidad di hunga e wega.

FUNDACION LOTTO

Sr. Di-Stefano Wernet, Presidente di Fundacion Lotto pa Deporte a duna di conoce cu nan ta hopi contento cu a alianza strategico cu nan tin cu Canadian Bank Note y CBN-Aruba for di 1999 a trece algo inovativo. E ta un producto nobo unda tin mas chens y por gana algo extra.

Meta ta pa haya mas fondo pa Deporte. Tin mas producto na caminda, segun Di Stefano Wernet.

 

Mester wak e competidornan pa cual tin un ley di catochi (gaming) ainda den Parlamento, unda mester tin transpariencia. E ley di catochi mester haya aprobacion y asina tin un fair play, cu sosten di pueblo, ya cu final di dia, Fundacion ta haci un apelacion na Minister duna Lotto e sosten como e loteria di nacional di Aruba.

 

 

Leave a Reply

Top