Tyson Lopez “1000voz ta algo nobo pa Aruba”

Tyson Lopez, miembro di Fundacion Digna Lacle Herrera hunto cu Fundacion Mito Croes, ta organisando e evento 1000voz diadomingo, a tene diarazon anochi un sesion di informacion y entrenamento p’e moderadornan cu lo ta sinta n’e mesa cu e participantenan.

Aki a registra un asistencia total cu a demostra atencion y enfoke, pero tambe entusiasmo p’e actividad na caminda.

 

E obhetivo di e sesion informativo tabata pa prepara e moderadornan pa nan sa con pa guia e diferente dialogo cu lo presenta. E moderadornan tin como responsabilidad pa guia e combersacion y ademas mantene un structura, ya cu durante e combersacion cu e participantenan ta diferente idea ta bin dilanti.

A delinea un sistema den cual ta sigura di capta e idea y conocemento cu e ciudadanonan ta bay aporta.

 

Tyson Lopez mes tabata encarga cu e preparacion basa riba su conocemento di e tipo di eventonan aki di participacion comunitario y e reaccion, e ta indica, tabata uno positivo.

“E feedback tabata hopi bon; hende ta entusiasma y esey por a wak na nan cara. Esaki ta un proceso nobo na Aruba y den e escala aki nunca a yega di wak prome na Aruba,” e hoben a bisa señalando acerca cu ta den contacto constante pa satisface nan preguntanan.

 

A duna di conoce cu registracion ta habri ainda tanto pa participante, como tambe pa boluntario. “Nos semper ta habri pa ricibi hende,” Lopez a bisa.

“Por laga sa atrabes di Facebook di AVP y tur hende cu kier participa pa duna contenido n’e combersacion por bay na www.1000voz.com caminda ta haya e formulario di registracion.” 1000voz ta diadomingo awor 7 di mei 2017, di 8:30 mainta pa 12:30 di merdia den sala grandi di Hilton Hotel. Participacion ta gratis y lo tin di bebe y come.

 

 

Top