Ultimo biaha tabatin un paro di 10 ora, pero e biaha aki lo cana pa Bestuurskantoor y e ora ey Minister Mike de Meza mester bin abao

Ultimo tempo por constata cu Presidente di STA, Diego de Cuba y Teo Croes, Director di Arubus ta sigui ta diferencia di opinion cu otro. Cada momento cu Diego de Cuba haya, e ta critica maneho di Director di Arubus, Teo Croes.
E situacion entre e dos instancianan aki no a mehora.

Diego de Cuba ta bisa cu esaki ta debi na falta di maneho, falta di seriedad y falta di vision. Diabierne ultimo tabata deadline pa gerencia di Arubus presenta su plan di recuperacion y tambe con nan ta bay drecha e busnan, cu mayoria di nan ta daña.

Segun Diego de Cuba ta bisa di no kier bay den detayes con placa ta wordo malgasta, pero su intencion ta cu e miembronan di STA por subi y core den un bus, cu ta apto pa ta riba caya. Nan kier un situacion optimal. Ta trata di hendenan grandi, cu tin nan responsabilidad y no ta intencion pa ningun hende subi bus pa haya accidente.

Loke cu gerencia di Arubus a presente como plan di rescate, a demostra di nan no ta serio. STA a manda carta pa Minister Mike de Meza pa atende e asunto di bus, serio, pero te awe, STA no a haya reaccion di parti di Minister Mike de Meza.
E ta un berguenza, cu despues di a manda e Hunta Directiva di Arubus cas, y tog no kier atende cu e sindicato.

Si Minister Mike de Meza no kier atende cu STA, anto e tin cu carga cu e consecuencia. Biaha pasa e trahadornan a bay den accion di 10 ora, pero e biaha aki, STA y su miembronan lo cana bay te Bestuurskantoor pa haya oido, segun Diego de Cuba.

REACCION ARUBUS
Segun Director di Arubus, Teo Croes, nan a firma un protocol y a keda palabra e confortabilidad di e bus. Aparentemente e hendenan di STA no ta compronde kico tin den dicho protocol.
Departamento di Tecnico di Arubus ta traha tur dia riba e busnan. Ningun bus lo subi caya, si e no ta save, segun Tico Croes. Consecuente tin masha bus para den garage.

Tur hende sa cu mester cambia e flota di Arubus, y e meta tabata cu AruParking lo mester genera e fondonan necesario pa cambia e busnan. Pero Gobierno a cambia su maneho, cu a pone cu awe AruParking ta sufriendo perdida y no por cumpra ni un bus.
Entrada di AruParking a ser corta te na mitar y maske cu Arubus a haya financiamento for di RBC, pero Arubus no a firm’e, pasobra Arubus no por cumpli cu e condicionnan di pago mas.

Awor ta keda na Gobierno, pa dicidi con lo bay na cumpra e busnan nobo, segun Teo Croes. Pero Arubus lo no laga ningun bus subi caya, si e no ta den bon condicion.
Experiencia di Arubus ta cu e busnan Volvo t’e mihornan. Pero e busnan cu ta bin ultimamente no ta di e bon manera esnan anterior. Banda di esaki, tin chofer cu no ta cumpli cu nan obligacion pa tin e bus mes den bon condicion. Pesey awe e bus e.o. ta den mal condicion, pasobra e sindicato no ta yuda den conscientisa su miembronan, cu nan mester ta mas responsabel.
Ta hunto mester cuida e compania, pa Arubus bay dilanti, t‘e mensahe di Teo Croes.

Top