Ultimo fase di trabou di Formador esun mas pisa

Por sinti cu e ultimo fase aki di formacion di un Gobierno ta manera un tiki bruha, of tin cosnan cu no ta wordo bisa.

E prome pregunta ta pakico ta manda nomber di 12 candidato pa screening. Esaki por ta pasobra tabata sa di antemano cu cierto candidatonan probablemente lo no pasa screening?  Of e por ta debi na discussion interno di cada partido cu ta bay forma coalicion a haci esaki?

Den e siman aki despues cu a wordo specula cu Glenbert Croes lo ta e persona cju ta bay haya e Ministerio di Utilidad, di repente por a scuch’e ta papia den un tono diferente den e conferencia di prensa di MEP, e mesun dia cu e lider di partido, alabes Formador, a acudi na Gobernador pa duna un update di e proceso andando. Por a scucha Croes bisa cu e lo sirbi pueblo sea como Minister of como Parlamentario, cual ta un tono diferente.

Extraoficialmente por a compronde cu si un persona tin beslag riba su salario / entrada, e no por bira Minister. E motibo ta cu un persona asina ta vulnerable.

Di otro banda no a tende nada di partido RED y POR, kendenan ta masha keto. POR su demanda ta dos Minister (cu ta e mesun cantidad cu nan asiento den Parlamento) y RED 1. E demanda di POR ta inhusto pa cu MEP cu tin 9 asiento y ta haya solamente 3 Minister mas cu e partido chikito aki,  y e diferencia di votonan ricibi entre e dos partidonan aki tambe ta hopi grandi.

Formador ta den un skina hopi preta, pasobra e mester dicidi si e ta mantene su mes na su expresion haci  di 7 Minister, locual lo nifica cu POR ta haya 1 Minister so, of subi esaki na 9, manera cu e Gobierno saliente a haci, pa por complace cu POR y forma un Gobierno y alabes, crea mas espacio pa complace cu su candidatonan. E no ta nada facil e trabou cu Formador tin, ya cu coalicion nunca tabata un formula facil pa traha cune.

Leave a Reply

Top