Un biaha mas Gobierno ta viola su propio protocol pa cu situacion na Dump

Trahadornan di Serlimar, ta masha disgusta, pasobra ta via prensa nan mester ser poni na altura di decisionnan di Gobierno pa cu Dump na Parkietenbos.

Di acuerdo cu Vice Presidente di SEPPA, Edmundo Marlin, na december aña pasa tabatin accion caba, cu desemboca den un protocol.

Ultimo dianan tin masha declaracion haci e.o. pa Minister Mike de Meza, kende a laga sa cu lo sera e dump proximamente.

 

Den reunion na december ultimo, despues di accion di e trahadornan di Serlimar, Prome Minister Mike Eman, hunto cu su Ministernan Benny Sevinger, Richard Arends y Mike de Meza a yega na un protocol. Na punto 6, mencion ta ser haci cu Gobierno yama un reunion cu Serlimar, SEPPA pa discuti plannan pa cu Dump na Parkietenbos.

Segun Edmundo Marlin for di dia cu e firma dicho protocol te cu awe, no tabatin ningun clase di reunion mas.

 

Te ora di e debate politico di Camara di Comercio, unda Prome Minister Mike Eman a declara cu lo sera e dump definitivamente. Basa riba esey, SEPPA a manda un carta pa Ministernan Mike de Meza y Benny Sevinger dia 12 di juni, unda a pidi un reunion cu caracter di urgencia pa tene cuenta cu punto 6 di e protocol. No a haya ningun reaccion, pero si por a tende di Minister Mike de Meza, kende ta ripiti cu lo sera e dump.

 

Un biaha mas por mira e modus operandi di Gobierno, cu no kier respeta un protocol cu nan mes a firma, cu lo sinta cu SEPPA y gerencia di Serlimar pa discuti e futuro plannan pa cu Dump. Ta den prensa e trahadornan ta haya sa ki meta Gobierno tin, sin envolve SEPPA y menos e trahadornan.

Wel e situacion aki no por sigui, ya cu e trahadornan di Serlimar ta dicidido.

Edmundo Marlin a declara cu ayera SEPPA a manda un carta pa Gobierno, caminda lo duna nan 2 x 24 ora pa yama e reunion di acuerdo cu punto 6 di e protocol.

 

Si no convoca e reunion aki, Gobierno por spera un accion pisa cu lo por desemboca den un welga. Pasobra esaki no t’e forma pa trata cu e trahadornan, cu ta traha pa un compania di pueblo.

Loke ta pasando, ta Gobierno mes ta crea e tension aki, cu no tin mester, pero e trahadornan ta dicidido, y no ta acepta nada mas. Nan kier claridad di e.o. kico lo sosode cu e Dump y kico lo para cu nan posicion huridico, segun Edmundo Marlin, Vice Presidente di SEPPA.

Mester tin mas respet p’e trahadornan y no mester tende via di prensa kico ta kico, maske cu Gobierno a laga sa cu e trahadornan di Serlimar lo no perde nan trabao.

Pero unda e sushi lo bay, si sera e Dump a corto plazo. Pesey a palabra lo sinta cu SEPPA y gerencia di Serlimar, kico lo wordo haci cu e compania.

 

 

Top