Un biaha mas Minister Mike de Meza a sigura trahadornan di Serlimar cu nan no ta perde nan trabou

Benny Sevinger, a reuni cu representante di trahadornan di Serlimar, STA y SEPPA ayera mainta.

E tabata un reunion urgente cu a wordo pidi, ya cu e funcionarionan tin miedo cu dor di cambio den e sistema di dump, un grupo lo perde nan trabou.

 

“Esaki absolutamente no t’e caso. Recientemente mi a informa nan caba cu e maneho pa cu dump no ta nifica cu nan lo perde nan trabou. Nan trabou ta garantisa,” e mandatario a bisa na final di encuentro cu e sindicatonan SEPPA, Magaly Brito y Raymundo Marlin, y STA, Diego de Cuba, kende t’esun cu a pidi un reunion cu Gobierno. (Nota di Red: Ta SEPPA for di diabierne ultimo a manda un ultimamatum 2 x 24 ora).

E preocupacion ta cu e trahadornan di Serlimar lo perde nan trabou como cu tin pensa di sera dump.

 

“Mi a splica nan un biaha mas cu esaki no t’e caso. Gobierno no tin intencion di laga niun hende bay cas. E trahadornan di Serlimar tin nan funcion y Serlimar tin su derecho di existencia, y ta haciendo un bon trabou pa Gobierno.”

E preocupacion di Gobierno, Minister de Meza a bisa, t’e situacion reinante na Parkietenbos. E sistema cu ta uza pa maneha dump, ta algo cu Gobierno ta haya cu mester cambia.

E situacion actual no por sigui asina, e ta hopi satura (yen), y ya a yega e momento cu mester sanea e dump di Parkietenbos y crea un espacio nobo, unda cu Serlimar lo haci su actividadnan relaciona cu e desperdicio di Aruba.

 

E sistema cu Gobierno kier pa maneha sushi, mester ta un sistema mas estricto, cu tecnologia mas avanza y di un forma mas responsabel. E situacion aworaki, e mandatario a splica, no ta nada agradabel ya cu tin un dump habri, cu hopi candela cu tin su efecto negativo p’e medio ambiente y esnan cu ta biba den e area ey.

E dump ta uno cu ta existi pa casi 50 aña y ta algo cu mester a wordo para basta tempo pasa caba, t’e opinion di e mandatario.

 

Diaranson ultimo mes Minister Mike de Meza tabata eynan y a mira un candela grandi, y cu ta demostra cu ta iresponsabel p’e dump sigui wordo maneha di e forma aki.

Den e situacion reinante e trahadornan ta haciendo nan esfuersonan maximo, pa cual e ta admira nan, pasobra e no ta un situacion responsabel pa nan sigui traha den e ambiente ey, y tampoco pa e becindario.

Pesey mester traha den un forma acelera riba un plan total cu ta tuma na consideracion e situacion a termino cortico y largo, pero den un forma sostenibel.

 

Esey a wordo splica n’e sindicatonan y cu ta imposibel pa sera e dump di un dia pa otro sin un otro solucion of alternativa serio.

Awor ta trahando riba un plan, sperando cu pa fin di luna por duna nan un presentacion di kico por haci na dump, pa sanea Parkietenbos.

Ta bay tin trabou pa hopi aña eynan mesora cu cuminsa cu e saneamento. Esey lo ta un trabou di Serlimar tambe, esta pa sanea e dump y tambe na un di dos sistema di atende cu desperdicio.

 

“Nos ta garantisa tur hende nan trabou. No tin un conflicto laboral. Cu tin hende ta preocupa dor di storia, mi por bisa cu tur aña di eleccion tin tur sorto di rumor cu ta wordo crea dor di esnan cu tin hopi tempo liber y hopi biaha ta oponentenan politico.

Serlimar ta un compania cu Gobierno ta kere den dje.”

 

Leave a Reply

Top