Un dia di salud sumamente exitoso: Caiquetio School enfocando riba cuido di salud y bienestar general di su alumnonan

Un di e aspectonan sumamente importante pa educa nos muchanan riba dj’e, ta e parti di cuido propio y bienestar general. Cu esaki den mente, juff. Mandy Angela y mr. Jefferson Gomez a prepara un dia di carousel cu e topico di salud pa tur e alumnonan di Caiquetio School.

Esaki ta di 3 aña cu nan ta organisando un carousel y cada aña ta cambia e topico, p’asina educa e alumnonan riba diferente area pa nan formacion personal y social.

Durante e diaranson mainta ey, e alumnonan a haya oportunidad pa participa activamente na e charlanan y e actividadnan relaciona cu salud. Nan a haya conocemento riba diferente topico relaciona cu salud y cuido di nan salud.

Rosetna Martinus a habri e mainta, unda el a elabora riba e contenido di nutricion, combina cu movecion y baile. Despues tabatin 6 post:

Post 1: Gregory Williams cu a aplica y haci diferente movecion di grado di dificultad.

Post 2: Cuido di djente, unda cu dr. Guido Wever a duna un presentacion anima y practico tocante cuido di djente y na final e alumnonan a haya pasta y skeiro di djente, cortesia di Martijn Trading.

Post 3: Purba den mi cushina cu Jeffrey La Rosa, unda na un manera masha simpel y facil, e alumnonan a siña traha salada di fruta y un sandwich saludabel.

Post 4: Maritza Ordoñes a presenta e importancia di tene curpa limpi en general, dunando ehempel diario tocante con e curpa ta absorbe bacteria, si no tene e curpa limpi.

Post 5: Jean Kock a duna un lectura tocante BMI, unda cu e alumnonan por a midi nan BMI y asina experiencia con nan BMI ta y haya conseho con pa ahusta nan comemento y movecion.

Post 6: Tabata algun actividad riba stencil, unda cu e alumnonan por reflexiona riba kico tur salud y bienestar general ta enfoca.

Cada un di e personanan cu a traha na e postnan, a yuda pa haci e actividad aki uno exitoso, como tambe e sponsornan: Mercal Trading, PriceSmart, Martijn Trading, Fruteria Virgilio,

Bright Bakery, New Food Center, Calidad Enterprices NV, y Manrique Capriles.

Un palabra di gradicimento ta bay na cada un di nan, cu sigur a aporta pa realisa e carousel di salud, pa e alumnonan di Caiquetio School y a kere den e proyecto aki.

Top