Un dia historico pa Women’s Club of Aruba

E reunion general di miembrecia di Women’s Club of Aruba (WCA) pa luna di maart tabatin como tema: “Hats Off / Hats On”.

Hats Off pa tuma despedida di sra. Clarette Refunjol como Miembro Honorario y Hats On pa yama bon-bini na sra. Hanneke Boekhoudt como Miembro Honorario nobo.

 

Despues cu ex-Presidente Vivian Storm a lesa e invocacion “Prayer for International Women’s Day”, e programa di honor a cuminsa.

A pone enfasis riba Dia di Hende Muher cu “A Shade of Purple”, cu tabata e color cu a wordo uza en general e aña aki pa celebracion di e dia aki.

WCA t’e unico club di hende muher na Aruba cu tin 82 aña di existencia, pues mas cu ocho decada.

E lugar caminda e reunion a ser teni, esta Renaissance Convention Center, tabata decora cu e colornan bunita di nos bandera, p’asina duna homenahe tambe na nos Dia di Himno y Bandera.

 

Tabata un dia historico pa WCA, pasobra nos organisacion no solamente a wordo honra cu bishita di Gobernador di Aruba, sr. Alfonso Boekhoudt, pero tambe cu bishita di ex-gobernadornan sr. Fredis Refunjol y mr. Olindo Koolman.

Tabata di elogia pa mira e tres mandatarionan hunto y nan tres di berdad a steal the show.

Esaki a bira un momento hopi special y emocional pa miembro Anna Geerman- Wever, kende a wordo reconoci riba e dia aki como Life Member.

 

Anna di Lago Heights a dedica hopi aña di su bida na trabou di boluntario pa nos comunidad y awor ta poco delicado di salud.

Artistanan invita p’e ocasion aki tabata Belen Kock- Marchena cu a declama su bunita poemanan; Esha Alwani, un hoben prometedor cu a caba di saca su cd nobo “Beautiful Esha” y trio Araguaney cu a deleita publico cu cancionnan tipico di Aruba, muy en especial cancionnan di Padu Lampe, nos Tata di Cultura.

Un y tur a sali hopi contento y satisfecho di e dia aki, cu sigur lo bay den historia como un dia unico!

 

 

Top