Un encuentro cu autor Denis Henriquez Presentacion di “Het sterven van Rebecca Lopez Ikario” na Biblioteca

Diaranson awo, 8 di februari, autor Denis Henriquez ta na Biblioteca pa presentacion di su ultimo novela “Het sterven van Rebecca Lopez Ikario”.

E programa ta cuminsa 8’or y ta tuma luga den hardin di departamento Arubiana/Caribiana na Bachstraat #5.

 

Dr. Wim Rutgers ta haci e introduccion y despues autor Denis Henriquez ta conta algo di su bukinan y kico ta su inspiracion pa skirbi. Tambe Denis Henriquez ta elabora rib’e relacion di su cuater novelanan na Hulandes den contexto di historia di Aruba di ultimo cincuenta aña.

 

Denis Henriquez ta bon conoci den mundo literario di reino. Algun obra cu por menciona di Denis ta e. o. riba tereno di teatro: “Mayan Dalia lo ta mi Dalia” (1978), “Fenchi a gana premio mayo” (1981), “The Mad T-party” (1983) y “E soño di Alica” (1988).

Den obranan di poesia un titulo conoci ta: “Kas Pabow” (1988).

Mas recien: “Lenga di mi mama” y “Aruban landscapes”.

Novelanan cu Denis Henriquez a skirbi ta: “Zuidstraat” (1992), “Delft Blues” (1995) y “De zomer van Alejandro Bulos” (1999) y e ultimo “Het sterven van Rebecca Lopez Ikario” (2016).

 

Denis Henriquez ta conoci cerca studiantenan di tur tempo cu a scoge pa lesa ‘Zuidstraat’ pa nan lista di Arubaanse literatuur. Su novelanan ta duna e lesado un bista di e bida den un caya of bario na Oranjestad den añanan cincuenta y sesenta di siglo pasa.

Lo tin oportunidad pa haci e autor pregunta riba su su storianan y poesia. Un invitacion ta bay pa publico en general.

 

E encuentro ta tuma luga otro siman diaranson 8 di februari den hardin di departamento Arubiana/Caribiana na Bachstraat 5, Oranjestad, di 8’or pa 10’or di anochi. Bo(so) presencia ta hopi aprecia.

Top