Un mensahe di Animal Rights Aruba pa comunidad tocante Abuso di bestia riba nos isla

Ultimo tempo ta sali mas y mas casonan di maltrato di bestia riba nos isla na cla. Awor esaki ta mas acesibel dor di e medionan social y asina e ta yega mas lihe na nos comunidad.
Nos por a tende ultimo di un meneer cu a cende pushinan chikito na candela den un caha di carton den mondi (banda di un scol), of di un cacho cu su doño tabatin mara na un cadena 24/7 y no tabata dun’e cuminda ni awa, tambe ultimo tabata e caso di un studiante di Colegio Arubano (San Nicolas) cu a maltrata un pushi dor di tira esaki contra un dak y tambe scop e.
Y, asina aki tin hopi caso mas cu practicamente tur dia ta tuma luga rib’e pida baranca aki.
Asina aki nos kier yama nos Isla “One Happy Island” of un “Isla di 5 strea”?

Sigur ta hopi lamentabel pa wak cu awe, na aña 2017, ainda riba nos pais chikito aki tin asina hopi caso di maltrato di bestia. Esaki ta bisa sigur hopi di nos pueblo su mentalidad, su moral. Unda nos hendenan a bay robes? Kico ta pasando cu nos norma- y balornan.
Norma y balor ta cuminsa na cas y na scol cu un bon enseñansa, pero tambe tur persona cu sentimento y un tiki sinti sa cu bo no ta haci un otro ser bibo y inocente daño. Pakico un persona lo haci un animal deliberadamente dolor? For di diferente investigacion cientifico a wordo saca afo cu hopi biaha personanan cu ta haci esaki ta paso nan por tin un of otro desorden psicologico, esta p. e. antisocial of psicopata. E estudionan ta bay asina leu di mustra e actuacionnan aki ta algo cu por ta comun bao di criminalnan (murderers and rapists).
Hopi ta cuminsa na chikito of como adolecente na tortura y mata animalnan. Es mas un estudio criminologico a mustra cu un tercera parti te cu mita di tur “(sexual) murderers” a abusa y/of tortura animalnan durante nan niñes of hubentud. Esaki sigur ta algo hopi serio cu mester atencion. (The link between animal cruelty and antisocial personality disorders, by: Cathy Babao-Guballa, www.inquirer.net) (What drives people to torture animals?, by: Mark Griffiths, www.independent.co.uk)

Awor ken ta esunnan cu tin cu carga e responsabilidad pa cu e problematica di maltrato di bestia? Ken ta esunnan cu ta sali na derecho di e animalnan? Tin varios fundacion riba nos pais cu ta yuda diariamente, pero esaki ta suficiente? Kico cada un di nos ta haci?
Pa nos por yega na un solucion pa e problematica di abuso di bestia nos tur tin cu asumi nos responsabilidad. Mayornan sea un bon ehempel. Si bo mes ta mara bo cacho 24/7 y no ta dun’e e cuido necesario, ki bo ta spera di bo yiu? E no lo sa miho toch? Sea un doño y mayor responsabel! Educa bo yiunan. Gobierno aplica nos leynan contra abuso di bestia, sostene e fundacionnan, bin cu “curriculum” pa nos educadornan por medio di Departamento di Enseñansa p’asina e maestronan por cuminsa educa e muchanan (for di chikito caba) riba derecho y cuido di bestia. Comunidad completo habri boso wowo pa maltrato cu tin rond di bo, ora bo wak un maltrato meld esaki na Polis, cu ta bo bisiña, bo famia of amigo, no keda sin haci’el e paso ta anos ta nan voz. E fundacionnan so no por haci’el e. Actualmente tin mucho mas fundacionnan y/of (grupo di) personanan cu ta tene nan mes ocupa cu e problematica aki y tur ta haci nan maximo esfuerso pero ta limita na boluntario y sigur limita na entrada financiero.

Conclusion ta cu no solamente dor di recoge animalnan riba caya lo bay soluciona e problematica ni tampoco solamente dor di yama e fundacionnan pa ayudo. E ta un problema cu por medio di educacion, conscientisacion, aplica ley, cada un di nos asumi su responsabilidad (comunidad completo, Gobierno, autoridadnan (Polis/Ministerio Publico), comerciantenan, educadornan, mayornan, fundacionnan lo por wordo soluciona.
Hunto so nos por logra haci un diferencia. Bo kier wak un cambio, cuminsa na cas, rond di bo, yuda den cualkier forma. Pa con chikito cu e ayudo ta, tur ayudo ta conta y ta importante.
No djis critica, actua! BE THE CHANGE YOU WANT TO SEE IN THE WORLD!

Top