Un morto a cay ayera mainta…Caso di atraco cu a bay completamente robes

WILLEMSTAD – Si sigi riba e ritmo manera morto ta cay di manera violento y criminal, casi-casi mester cuminsa pensa riba un ‘santana express’ pasobra fo’i dia aña nobo a cuminsa, ta morto tras di morto ta cay.

Cu si no ta accidente na trabou, ta accidente den trafico of pió ainda, masacre caminda ta mata hende inocente.

 

Ayera mainta tabatin un caso cu ainda autoridadnan no a duna nan version y cu a tuma lugar den Curá Piedra caminda bisiñanan a yama Polis pa zonidonan di bala den e bario na Caya Hematita. Na yegada di Polis, nan a topa un hòmber cu varios herida di bala y den un situacion bastante grave.

Personal di ambulance cu a yega n’e sitio a purba di tur manera pa reanimá e victima, pero no a logra scapa bida di e homber.

 

Di informacion cu Polis a haña n’e sitio ta cu tres tipo mester a bin den un vehiculo chiquito y aki nan a tira atraco riba habitante di e cas. Despues di nan acto nan a lòs tiro cu consecuensia cu un homber a bin perde su bida.

 

VERSION OFICIAL DI POLIS

Den oranan di merdia, nos a recibi version oficial di Polis cu ta bisa, dialuna 3 di april 2017 alrededor di 09.39 or, Central di Polis a dirigí un patruya na Caya Hematita pa un caso di tiramento.

Na yegada di e patruya, nan a bin topa cu un hòmber – cu despues a resultá cu t’e habitante di e cas- drumi abou den balcon patras di e cas cu no tabata duna señal di bida.

Un investigacion mas profundo n’e curpa di e víctima a resultá cu e tabatin herida di bala n’e parti ariba di su curpa.

 

For di un investigacion preliminar cu Polis a realisá n’e sitio a resultá cu un auto a core drenta den cura di e cas y a pasa bay patras di e cas.

Eynan tres (3) hòmber, dos (2) di nan cara tapa a baha for di auto y a bay den e cas y a menasa tur hende presente cu arma di candela.

E sospechosonan a hasta agredí un mucha menor di edad y un di e habitantenan.

 

Despues di esey pa un motibo te ainda desconocí, bala a cay y a alcansá un habitante di cas. E víctima aki ta Edward Anthony Leito nacé na Còrsou 12 decèmber 1947 (69 aña)  a ricibí tiro den e parti ariba di su curpa y a fayecé n’e sitio mes.

Prome Minister Pisas y Minister di Husticia, Ribeiro tambe a acudi n’e sitio pa sigui di serca e caso, pero mucho nan no por haci.

 

E sospechosonan a bay cu algun pertenencia di e víctima y despues a huy for di e sitio.

Dòkter di Polis a constatá morto di e víctima.

Riba òrdo di Fiscal di Ministerio Público a confiscá e curpa sin bida di e víctima pa mas investigacion.

Polis ta suplicá un y tur cu ta dispone di informacion di e caso aki pa pasa e informacion pa Polis na number di telefònnan: 866-6141 – 917 y 108 (riba e number aki bo anonimidad ta garantisá).

Top