Un muestra di gratitud, reconocimento y estimulo cu Aruba ta duna na su atletanannan

Durante di e evento di gala Premio Excelencia den Deporte 2016 ta haci entrega di e maximo galardon n’e atletanan cu a destaca den e aña deportivo cu a transcuri.

Manera tur aña, Gobierno pa medio di su Ministerio di Deporte ta premia e diferente categorianan di edad, esaki femenino y masculino.

E aña aki un total di 9 categoria lo wordo premia, mientras lo duna reconocimento n’e nobato femenino y masculino 2016 como tambe e scol basico y avansa cu mihor resultado durante di e deporte escolar 2016 (nomina dor di IBiSA).

 

Ta bay reconoce e MVP 2016 di scol basico y avansa. Tambe ta reconoce e atleta femenino y masculino di Special Olympics Aruba cu a destaca den e aña deportivo 2016.

Mester corda cu Premio Excelencia den Deporte t’e unico evento deportivo unda nos mihor deportista den tur edad ta bin hunto p’asina wordo reconoci pa nan prestacionnan deportivo.

 

E ultimo dia pa entrega nominado di un of mas atleta lo ta diarazon 1 di maart. Algun Federacion Deportivo ya a reacciona den forma positivo, mientras otronan tin cu manda nan nominadonan ainda.

Comision PED tin e speransa cu den e dianan siguiente e federacionnan aki lo reacciona y nomina nan mihor atletanan cu a destaca den e aña deportivo 2016.

 

Manera a wordo bisa anteriormente den Premio Excelencia den Deporte 2015 lo premia un total di 9 categoria esaki di infantil, hubenil, nobato, ekipo, atleta di aña local y internacional como tambe e scolnan di aña.

Top