Un obra cu a dura varios aña pa keda realisa

Diabierna awor, dia 17 di maart, for di 6or di atardi Plaza Padu, e plaza monumental tras di edificio Cocolishi, ta wordo inaugura durante un manifestacion nacional cultural.

E plaza ta carga nomber di Juan Chabaya ‘Padu’ Lampe como muestra di honor pa tur loke Padu ta nifica pa cultura di Aruba y sin duda algun pa ta co autor di nos Himno Nacional Aruba Dushi Tera.

 

Inauguracion di Plaza Padu ta culminacion di e programa di renobacion di centro di ciudad di Gabinete Eman I y II. Pa keda den e ambiente musical y cultural, esaki t’e apoteosis di un simfonia composita den forma cuidadoso di un cantidad grandi di proyecto di renobacion inicia dor di e Gabinete aki desde 2009, cu resultado un enorme embeyecimento di Oranjestad.

Remodelacion di entre otro caya grandi, Plaza Daniel Leo, Plaza Nikky Habibe, Plaza Wilhelmina, construccion di edificio di Cocolishi, ehecucion di e tram espectacular, renobacion y ampliacion di Corte di Husticia, renobacion di e edificio bieu di oficina di belasting, Cas di Gobernador, Watertoren, renobacion y embeyecimento di museonan existente y apertura di museo nobo, establecimento di Welcome Plaza, Linear Park, areglo structural completo di barionan manera Rancho y Madiki, tur proyectonan prestigioso cu a percura cu e Gobierno cu haci un completo make-over’ di centro di ciudad.

 

Cu e facelift rigoroso aki e producto turistico Aruba a haya un inmenso upgrading. E proyectonan den centro di ciudad ta parti di e programa masivo di inversion di Gabinete Mike Eman I y II pa loke ta su renobacion, renobacion di barionan, trabounan infrastructural grandi manera Waf di Barcadera, e caminda di 4 via pa San Nicolas y un cantidad grandi di proyectonan di construccion, manera ampliacion di dr. HOH cu dos hala nobo.

E base p’e plannan pa ugrade Aruba a wordo poni caba for di tempo di oposicion di AVP na 2001-2009.

 

Bou di e guia inspirativo di e tempo ey lider di fraccion y lider di partido Mike Eman y den cooperacion cu universidadnan internacional di renombre a traha mayoria di e diseñonan pa mehoracion di centro di ciudad. Sin duda por conclui cu Eman a traha hopi aña riba su simfonia.

Diabierna pueblo di Aruba ta keda invita pa develo di e estatua riba Plaza Padu, den presencia di Padu mes kende tin e edad respeta di 96 aña.

Top