Un Pami Un P’e un proyecto dedica na e grandinan den nos comunidad

Rotaract Club of Aruba, e grupo di young professional cu ta forma parti di e famia di Rotary Aruba, ta sumamente satisfecho cu un otro edicion exitoso di e proyecto anual, Un Pami Un P’e.

Un Pami Un P’e ta un proyecto unda miembro y boluntarionan ta colecta varios articulo durante un periodo pa despues entrega esaki como donacion serca un grupo den nos comunidad.

 

Un Pami Un P’e ta un proyecto cu tabata wordo organisa durante e luna di december dirigi na famianan cu menos recurso. Pero aña pasa a opta pa cambia e forma di e proyecto aki un tiki y asina a bin na e forma nobo unda cu e consentimento di Stichting Algemene Bejaardenzorg Aruba (S.A.B.A.) ta colecta articulonan cu e grandinan lo por haci bon uso di dje.

 

E prome aña miembro y boluntarionan a colecta varios articulonan hygienico y washandjes cu a suma na un balor di mas di 10mil florin. E aña aki a opta pa colecta articulonan cu e grandinan por haci obra di man cu ne. Pa 6 siman largo, miembro nan di Rotaract Club of Aruba a para na Dyon Center y a acerca consumidor di Dyon Center pa aporta na e proyecto. Total a logra colecta 10 baki di plastic yena cu articulonan pa haci obra di man.

 

Ademas, a logra di traha estrechamente cu e industria hotelero pa ricibi donacion di paña di cama, serbete y washandjes. Rotaract Club of Aruba ta sumamente agradecido cu e generosidad cu nos a ricibi for di Hyatt Regency Aruba Resort and Spa, Hilton Aruba Caribbean Resort & Casino, Holiday Inn Resort Aruba y tambe Aruba Marriott Resort & Stellaris Casino pa cu e proyecto aki. Asina aki a logra haci un donacion di mas cu 1000 pida di articulonan consistiendo di serbete, washandjes, clechi cama y slopi cu sigur nos grandinan lo haci bon uzo di dje. Ademas, Lucky Store a yuda contribui cu 5 rolstoel nobo nobo cu tambe a wordo regala na S.A.B.A.

 

Pa culmina e proyecto aki y alabes haci entrega di tur donacion colecta y ricibi, Rotaract Club of Aruba a organisa un mainta ameno, diasabra 13 di mei, pa celebra cu e grandinan pero tambe gradici tur enfermeronan riba nan dia internacional di enfermeria, cu tabata 12 di mei.

Asina a percura pa tin snacks dushi di Aruba y resfresco pa tur presente. E grupo di miembro cu tabata encarga pa organisa e proyecto aki a invita sr. Francis Jacobs pa entretene tur presente cu varios canticanan.

 

Miembronan, boluntarionan, staf di S.A.B.A. y miembronan di Rotary Aruba a baila y canta hunto cu e grandinan y asina percura pa un ambiente ameno durante e mainta aki.

Pa percura cu un y tur keda cu bunita recuerdo di e dia aki, Awesome Photo Booth Aruba tabata presente y a saca potret di cada un di nos grandinan.  Ademas miembronan di Rotaract a traha un “photo frame” pa tur nos grandinan.

 

Rotaract club of Aruba kier a gradici su miembronan, boluntarionan, Rotary Aruba, y sponsornan: Hyatt Regency Aruba Resort, Spa & Casino, Hilton Aruba Caribbean Resort & Casino, Holiday Inn Resort Aruba, Lucky Store y Aruba Marriott Resort & Stellaris Casino pa nan bunita donacion. Sin lubida e bunita sosten ricibi di Dyon Center N.V., y Awesome Photo Booth Aruba pa proyecto aki.

 

Por ultimo, Rotaract Club of Aruba kier a gradici e comunidad di Aruba pa nan gran aporte na e proyecto aki. Sin e sosten di nos comunidad nos no lo por a logra e bunita proyecto aki.

Top