Un plan dirigi riba desaroyo di e producto turistico cu ta tene cuenta cu nos bishitantenan y nos comunidad – Oficina di turismo ta presenta e plan pa nos destinacion “Cu Mira pa Futuro”

E siman aki, e plan ‘Cu Mira pa Futuro’ a wordo presenta oficialmente na tur socio como tambe publico general cu a forma parti di e proceso pa formula un plan pragmatico pa cu un desaroyo balansa di e producto turistico di Aruba.

 

Durante lansamento di e plan, Ronella Tjin Asjoe-Croes, CEO di Aruba Tourism Authority a duna di conoce cu, “Nos destinacion a y ta mira hopi exito den turismo en general, pero e era di desaroyo actual ta rekeri hopi mas atencion riba desaroyo di nos isla. Aruba tin un producto turistico relativamente madura y tambe e biahero ta en busca di aspectonan cu mester ta mas presente riba nos isla.

90 accion concreto a wordo delinea den e plan “Cu Mira pa Futuro”, variando di accionnan pa stimula inovacion como tambe accionnan pa duna atencion debido na proteccion di nos cultura, naturalesa y medio ambiente. A.T.A. lo continua na traha cu esnan concerni enfocando riba desaroyo den bienestar di nos pais.”

 

Aruba ta un isla chikito cu ta depende di turismo pa cu su desaroyo economico.

Esaki ta pone presion rib’e recursonan natural y social di nos isla. Pa sigui ta exitoso den futuro, ta sumamente importante pa guia desaroyo di e destinacion.

Ta pa es motibo aki, Aruba Tourism Authority a embarca rib’e proyecto “Cu Mira pa Futuro”.

A.T.A. no ta responsabel pa ehecucion di cada accion delinea, pero a facilita e proceso di produccion di e plan y a trece hunto tur area di enfoke, dirigi naturalmente riba un desaroyo turistico sostenibel di nos isla. A.T.A. lo sigui facilita e proceso di ehecucion.

 

Durante un periodo di 10 luna, A.T.A. conhuntamente cu mas di 350 socio cu ta forma parti di departamentonan gubernamental, sector priva, NGO’s, studiantenan y e pueblo di Aruba en general a delinea accionnan segun categoria, importancia, tempo cu lo tuma pa implementa, y esnan cu mester lidera ehecucion di e. o. e accionnan.

E plan ta consisti di 5 obhectivo strategico y 22 punto di prioridad cu a resulta den 90+ punto di accion concreto. Pa cada punto di e prioridad a wordo identifica accionnan concreto cu lo wordo implementa den e proximo 4 pa 5 aña.

A opta pa un proceso participatorio, “bottom up”, p’asina tur elemento di e destinacion por wordo revisa di un manera transparente y interactivo. Hunto cu socionan a logra alinea e diferente accionnan cu ta rekeri atencion di varios departamento gubernamental y organisacionan priva, como tambe NGO’s, p’asina sigura cu tur elementonan cu ta toca desaroyo di e producto turistico en general ta rib’e mesun liña cua vision y pasonan cu mester wordo tuma den e proximo 4 pa 5 aña.

E plan strategico, pero pragmatico, cu ta conta cu e sosten di socionan, ta di sumo importancia pa asina por alinea y determina e siguiente pasonan pa haci di Aruba uno mas dushi pa biba, como tal uno dushi pa bishita.

 

Durante su discurso, Tjin Asjoe-Croes a pone enfasis cu mester tuma accionnan consistente y bon calcula pa asina conserva y proteha sigur 3 aspecto cardinal cu ta forma fundeshi di nos desaroyo turistico cu ta; nos playanan, nos hospitalidad y e seguridad cu nos destinacion ta brinda.

Ademas, e ta kere firme cu hopi lo ta di acuerdo cu Aruba su desaroyo turistico no mester ta basa solamente rib’e exitonan y accionnan di pasado, como cu esaki no por duna resultadonan similar p’e futuro.

Cu e obhetivonan y accionnan defini den e plan “Cu Mira pa Futuro”, ta aspira pa conhuntamente cu tur envolvi pone e puntonan cardinal den accion.

 

Aruba Tourism Authority ta invita y encurasha un y tur pa “download” e plan aki y pa ta informa di e contenido y pa sigur haci uso di dj’e pa decisionnan actual y di futuro.

E plan ta obtenibel riba www.cumirapafuturo.com of por sigui nos tambe riba Facebook @CuMiraPaFuturo.

 

E desaroyo di e plan “Cu Mira pa Futuro” ta forma parti di A.T.A. su “business plan” p’e periodo di 2014 – 2017 y ta forma parti di e strategia di maneho di A.T.A. pa tin un rol mas activo den maneho integral di nos producto turistico, den su capacidad como e “Destination Marketing and Management Organization” (DMMO) di Aruba.

Den e proximo simannan A.T.A. lo presenta cada un di e pilarnan strategico di e plan y lo enfatisa puntonan cardinal di e plan di accion. Esaki lo brinda publico mas informacion di e plan aki.

 

A.T.A. ta gradici un y tur cu a forma parti di e proyecto aki y cu asina contribui na desaroyo di e plan. Danki ta bay na e “Sounding Board” cu a wordo forma specialmente pa e proyecto aki y cu ta consisti di: Jane Semeleer, Robertico Croes, Glenn Thode, Myrna Jansen-Feliciano, Ruben Goedhoop, Alwyn Lin and Doug Lansky.

Tin cu extende palabra di gradicimento tambe na e ekipo di A.T.A. cu a traha directamente rib’e proyecto “Cu Mira pa Futuro”: Isha Tapias-Kock, Dyane Vis-Escalona, Patrick Melchiors, Sanju Luidens-Daryanani, kende conhuntamente cu Ronella Tjin Asjoe-Croes y Varelie Croes a dedica hopi atencion na produccion di e document aki. Ta gradici Varelie Croes kende A.T.A. a contrata pa guia produccion di e plan aki. Un talento local, cu trayectoria internacional, y cu mira riba inovacion, kende a contribui grandemente na realisacion di a plan aki.

Top