Un tata preocupa a entrega 8940 firma na Parlamento expresando preocupacion rond di abuso di menor

Ayera diahuebs, Presidente di Parlamento a ricibi 8940 firma for di un tata preocupa, sr. Jairo Maduro, acompaña pa un mama preocupa, sra. Grislin Hernandez.

E tata preocupa a tuma contacto cu e Presidente di Parlamento y a haci un cita pa sinta na mesa y entrega e firmanan.

 

Wyatt-Ras ta haya esaki un bon ehempel con un persona por acerca Parlamento.

E tata a mustra su preocupacion pa diferente aspecto, tanto pa loke ta trata e ayudo na victimanan, a sistema di castigo y e hecho cu e zedenkit tin cu bay te Hulanda.

El a splica cu hopi a ser haci durante e añanan, pero cu natural tin ainda aspectonan cu tin cu haya atencion.

 

Wyatt-Ras a menciona e rapport di aña 2010 cu e comision Parlamentario cu a lanta pa atende cu abuso di mucha a traha y e otro rapport cu su mes a traha na aña 2016 hunto cu e comision di Salubridad a base di un manifesto entrega na Parlamento.

 

Leynan sigur a ser cambia tanto na 2007 como despues ora cu e Codigo Penal a ser adapta completamente. Castigonan a bira mas severo y tambe boetnan.

Sinembargo e problema ta keda cu mester haya prueba. E argumento aki tambe ta conta pa castigo minimo. Pa falta di prueba no por actua.

 

P’esey banda cu e castigonan mester bira mas halto a enfoca riba mehoracion di e servicio. Gobierno a base di mocion entrega dor di Parlamento a amplia buro Sostenemi p’asina haci e prome acohida na victimanan miho.

 

Den nos Codigo Civil cu a ser aproba tambe na 2016 ta regla tambe e existencia di buro Sostenemi y ta regla bou di cual Ministerio esaki ta resorta. Parlamento a encarga Gobierno pa dos Ministerio por carga esaki.

 

Un otro aspecto importante ta prevencion. En bista cu consecuencia di abuso di mucha tin consecuencianan di largo duracion ta di importancia pa evita, esta prevencion. Por a tuma nota cu pa loke ta trata prevencion cu porfin Aruba lo conta cu un curriculum riba sexualidad cu lo haci posibel cu na scol por papia di e asunto aki cu ta un taboo. Esaki lo contribui na prevencion di abuso dor di informa e mucha/hoben encuanto su curpa y limitenan.

 

Wyatt-Ras ta enfatisa cu den nos comunidad mester kita e miedo y e taboo pa denuncia actonan indesea contra moralidad di e mucha/hoben.

E hecho cu un abusado p. e. ta haya solamente 3 aña di castigo en comparacion cu e consecuencianan de por bida di e mucha ta haci cu hopi cuidadano ta rabia.

Pasobra aunke cu den ley e castigonan a subi toch ta scoge pa no duna e malhecho dicho castigonan.

Aki ta di importancia pa e instancianan concerni refleha y yega na otro forma di duna e castigonan. Por lo pronto e topico di abuso di mucha lo keda un topico cu atencion di Parlamento.

Top