Universidad di Còrsou a firma MoU pa cooperacion cu GZE y China Petroleum University

Durante di un ceremonia simpel den presencia di Minister (Interino) di Enseñansa, Ciencia, Cultura y Deporte, Hensley Koeiman a tuma lugar diabièrnè 20 di janüari firmamentu di un Memorandum of Understanding (MoU) entre Universidad di Còrsou (UoC), China University of Petroleum na Beijing (CUPB) y e compania estatal Chines Guangdong Zhenrong Energy Co. Ltd (GZE).

 

Segun declaracion di Rector Magnificus di UoC Francis de Lanoy, GZE y CUPB ta dispuesto pa aportá n’e inversionnan necesario pa desaroyá un departamento nobo specialisá riba e tereno petroquímico, cual riba término largo por bira un facultad petroquímico completo.

Esaki ta amplia posibilidadnan pa UoC bay haci mas investigacion académico y asina profundisá e conocemento lokal riba tereno petrolero.

 

Pa ta franco, pa UoC ta conta cu un facultad asina lo mester tabata existí caba na Còrsou, considerando e hecho cu tin un refineria establecé aki ya pa un siglo caba.

E MoU t’e base pa yega na un cooperacion estrecho y di término largo entre e dos universidadnan.

E promé meta cu UoC y CUPB hunto a pone pa logra, ta algo cu lo mester keda cristalisá riba un término hopi corto.

E intencion ta pa e dos universidadnan hunto ehecutá e asina yamá Work Force Development Plan (WFD).

 

For di fin di aña pasá GZE ta negociando cu Refineria di Còrsou (RdK) un còntract pa modernisacion y upgrading di Refineria Isla, CRU y Bullenbaai, y e WFD ta instrumental pa desaroyá un cantidad di 4.500 trahador den e modernisacion y upgrading aki.

Ta planificá pa cuminsá ya den e promé mitar di 2017 cu entrenamento na trahadornan di construccion, inspector, forman den Health Safety and Environment (HSE), operator y trahador técnico.

GZE, como e compania cu lo ta responsabel pa tanto e modernisacion como desaroyo di e capital humano, a considerá cu UoC por hunga un ròl prominente den e WFD aki, den cooperacion cu China University of Petroleum.

 

E universidad aki, cu ta specialista den e sector petrolero, tin un netwerk internacional hopi extenso y ta usa companianan petrolero di renombre como Training Partner, manera British Petroleum, Shell, Total, Schlumberger y China National Offshore Oil Corporation.

Filosóficamente Presidente di GZE Binyan Chen a declará n’e ceremonia cu pa cultivá un pal’i fruta ta tuma 10 aña, pero pa cultivá hende ta tuma 100 aña.

 

GZE ta spera cu a base di cooperacion lo por sigui cultivá e intelecto petrolero na Còrsou. Wang Wenchao di China University of Petroleum a añadí cu su universidad ta cla pa sigui desaroyá e talento lokal riba vários otro tereno tambe, refiriendo e.o. na áreanan gerencial, financiero, administrativo, bancario y turístico.

Minister Hensley Koeiman ta mira posibilidadnan grandi pa studiantenan den region Caribense tambe bin studia na UoC.

Ta p’esei p’e, e cooperacion entre e dos universidadnan ta un oportunidad único pa Còrsou, y e lo duna tur sosten y cooperacion caminda ta necesario pa logra esaki.

 

E MoU aki ta un di e resultadonan concreto di e acuerdo den liñanan grandi (‘Heads of Agreement’) cu GZE a firma cu Gobièrno di Còrsou y RdK dia 19 di novèmber 2016. Den e acuerdo aki GZE a comprometé su mes pa modernisá e refineria, CRU y e terminal na Bullenbaai pa nan por cumpli cu e normanan medio-ambiental internacional di mas halto.

GZE lo huur y operá e refineria y CRU pa 40 aña. Den cuadro di esaki GZE tambe tin e responsabilidad pa producí e Work Force Development Plan pa mas tardá 30 di april awor.

GZE awor aki, durante di su bishita na Còrsou, a entregá e promé concepto di e plan.

Top