UPDATE: Dos agente policial deteni como sospechoso relaciona cu un investigacion penal

For di Oficina di Prensa di Polis, nos a haya informacion cu den cuadro di nan maneho semper transparente Cuerpo Policial Aruba kier informa cu dos colega di nan a ser deteni p’e instancianan concerni pa investigacion.

Mirando cu e investigacion ta andando no por duna mas detayes n’e momentonan aki. Te aki e comunicado di prensa.

 

Mientrastanto ayera tardi, Sindicato di Polis (SPA) a convoca un reunion cu caracter di urgencia pa su miembronan na Piedra Plat Entertainment Center, cu e meta pa informa nan kico ta pasando.

Tabata e Presidente, Juancho Gomez, kende a confirma cu dos colega a keda deteni y ta nan deber como sindicato pa informa nan miembronan di kico ta pasando.

Como un sindicato responsabel, a dicidi di convoca e reunion aki pa pone e miembronan na altura di kico ta pasando.

 

Segun e Presidente, den e caso aki tin un procedura, y esaki mester cana su caminda. Pero Juan Gomez, ta admiti cu SPA no por duna mucho informacion di e investigacion, pa cual e no kier ni menciona ki delito a ser cometi. Y esaki ta haci cu tin masha speculacion, manera por a mira caba riba varios social media.

Si Juan Gomez, e no tin nada di haci cu Carnaval, pero tampoco tin di haci cu e caso di un colega deteni caba, ni tampoco e ta un caso hopi ayega n’e caso aki.

Hecho ta cu tin varios detencion haci caba, pero Gomez no a specifica kico e kier men cu esaki.

 

Loke Juancho Gomez ta lamenta cu Mando Policial no tabatin e decencia pa sikiera informa SPA di kico nan ta bay haci of a haci, esta di bay over na detene dos colega.

 

SPECULACION

Manera menciona, como no tin informacion concreto duna, di biaha tin masha speculacion.

P.e. riba 24Ora.com ta bisa cu e Polisnan J.Y. y tambe A.X.W. a keda deteni ayera den oranan di mainta pa sospecho di maltrato serio. Departamento interno di Cuerpo Policial, BIZO ta atendiendo e caso aki cu a sosode riba e anochi Carnaval na un cas na Paradijs.

E detencion parce segun e agentenan no a bay facil pasobra e homber a resisti. Como cu e homber a resisti, Polis bati’e malamente te cu na Hospital a constata cu e cashi wowo ta kibra y tin ribchi tambe kibra.

 

Un otro social media, Boletin Extra ta publica cu e agentenan, di fam W y Y a keda deteni. Mesun inicialnan cu 24Ora.com a publica, pero den e caso aki Boletin Extra ta bisa cu diadomingo atardi di Carnaval grandi dos agente policial cu lo ta famia of conoci di otro a yuda un dama, famia di nan, drenta un cas na Paradera.

E manera lo no tabata hustifica segun a compronde. Motibo tabata cu n’e adres lo tabatin un dama Latina, cu aparentemente a termina un relacion amoroso cu e dama cu a presenta cu nan.

Esaki no a cay den bon tera, paso e dama lo a conoce un otro dama.
Nan lo a sake di e adres y hibe oficina di Warda nos Costa, caminda ayera mainta prome cu e lo a wordo manda bek, a bay oficina di Landsrecherche y haci un denuncia di loke e pasa Carnaval atardi. Segun Boletin Extra ta kere cu esey lo tabata e motibo cu Landsrecherche a detene e dos agentenan envolvi di e atardi di Carnaval y ta trata di agentenan di fam W y Y.

 

E ultimo speculacion ta, cu for di basta tempo caba, dos agente policial a haya prohibicion pa drenta Wardanan di Polis, pasobra nan ta ser investiga. Nan lo ta kita droga for di drogadictonan y ta tuma esaki pa nan propio uso.

Nificando cu tin consumo di droga bao di Polis. Un biaha mas, como e minimo a ser duna como motibo di detencion di e dos agentenan, ta surgi un cantidad di speculacion, sperando cu lo por haya claridad di esaki.

Top