Van Riet hefe nobo di Departamento di Asuntonan Huridico General

Entrante 1 di november 2017 Mr J.A. (Hans) van Riet a cuminsa como hefe di Departamento di Asuntonan Huridico y General di Directorado di Maneho y Sosten. E tin amplio experiencia  den abogacia, tanto riba tereno di derecho civil como derecho administrativo y alabes como hurista den servicio di Ehercito Hulandes.

Prome cu ela acepta e desafio como hefe di Departamento di Asuntonan Hurídico y General di Directorado di Maneho y Sosten sr van Riet desde 2009 tabata traha den e funcion di hurista militar pa e Comando Forsanan Arma na Tera. Durante e periodo aki ela ehercé diferente funcion, entre otro e tabata trata casonan di obheccion y apelacion y e tabata hurista junior y senior na nivel di maneho di derecho penal y disciplinario y di derecho estatal y administrativo, hurista di brigada y hefe di Oficina di Asuntunan Huridiko. Tambe durante momentonan di mission y ehercisio den exterior el a adkerí experiencia amplio riba tereno di derecho internacional.

Sr van Riet ta mira como un reto pa hunto cu tur empleado traha dirigí riba mehoracion di dunamento di servicio y riba alcansamento di resultadonan cu ta di importancia pa tanto e comunidad Boneriano como Entidad Publico Boneiru. E retonan aki ta cuadra estrechamente cu e vision y mision di e Directorado di Maneho y Sosten. E lo por usa su habilidad analitico, su abilidad pa tuma decision, su abilidad di perseverá, su abilidad pa anda cu stress y su abilidadnan organisatorio hopi bon na momento di eherce e funshon nobo aki.

E hefe anterior di e Departamento di Asuntunan Hurídico y General, sr M. (Bert) Nijland ta keda traha como hurista legislativo na e departamento. Asina’ki e Departamento di Asuntunan Huridico y General lo sostene gobierno di Entidad Publico Boneiru huridicamente y administrativamente na un manera integral y structural y aporta na desaroyo di legislacion y regulacion.

Leave a Reply

Top