Visibility Team ta sigui patruya den centro di Oranjestad

Entre dia 13 pa dia 25 di maart Visibility Team di Cuerpo Policial tabata hopi activo den centro di Oranjestad cu diferente accion. Nan tarea di prevencion ta intensifica na momento cu tin barco crucero mara den waf, pa evita cu e miles di turista cu ta bishita e isla no haya nan mes confronta cu incidentenan menos agradabel.

Dia 13 di maart, Visibility Team a haci control di vehiculo den cercania di e brug di Renaissance y a duna 6 proces-verbaal en conexion cu “rijrichtingverbod”, esta coremento den e direccion prohibi.

Cu mas of menos 5000 turista na Aruba riba dia 14 di maart a haci controlnan den e area di e salida principal di APA, den e area di e mercado y banda di The Paddock. A patruya y a mantene “post” cu ta keda den un area so.

 

Banda di 11’or di mainta empleadonan di AruParking a pidi asistencia pa cu molester riba e plenchi di parkeer na Elleboogstraat cu e adicto ambulante conoci como “Bin Ladin”; y mas laat un otro adicto ambulante “Pieternella” a wordo haya ta pidi limosna den becindario di Kong Hing den Havenstraat, causando molester na turistanan.

Agentenan a atende cu tur dos persona, y a avisa Pieternella cu por dun’e un proces-verbaal pa pidi limosna.

A topa Pieternella atrobe mas laat, y a papia cune y a pone sali for di e area.

 

Dia 15, cu tres barco y 7400 bishitante na Aruba, Visibility Team tabata activo n’e entrada principal di waf, y ful e area di centro di ciudad frecuenta p’e turistanan, incluyendo e area di Surfside.

Tambe a controla y a duna boet na algun coredor di auto pa falta di uzo di e faha di seguridad. Un persona a bira grocero cu Polis y a sigui nan sacando potret.

Un biaha mas agentenan a para e auto y papia cu e señora tocante di su comportacion y a splik’e cu si e no ta di acuerdo cu e boet, e por entrega un keha na Ministerio Publico.

E situacion aki a tuma lugar den becindario di Mido Supermarket.

 

Atrobe durante di control Polis ta topa cu un adicto ambulante conoci, esta J.; esaki na haltura di Bestuurskantoor. Polis ta papia cune y sac’e for di e area.

Cu Norwegian Pearl y Carnival Vista den waf e dia siguiente, tabatin mas of menos 6700 turista den Oranjestad. Miembronan di Visibility Team a keda den cercania di e entrada principal di APA y e mercado.

Dia 17 di maart tabatin controlnan regular den centro di ciudad te cu Surfside. A tene controlnan di trafico den Middenweg, cerca di Mido Supermarket y un Polis a duna un total di 11 proces-verbaal pa coremento sin ahusta e faha di seguridad.

 

Polis a wordo yama pa asistencia pa cu un disputa entre turistanan y un taxista na lobby di Renaissance Ocean Suites. E pareha turista tabata nenga di paga e “tarifa adicional” ora cu core den taxi cu paña muha.

Cu intermediacion di parti di Polis a mustra e pareha cu nan a bay di acuerdo cu e regla cu e taxista a mustra nan y consecuentemente nan a dicidi di paga e taxista e 50 dolar.

Dia di Himno y Bandera Visibility Team a patruya den centro di ciudad, na mercado, Aruba Ports Authority Surfside, Linear Park y de becindario di Cas di Partido di AVP en conexion cu diferente evento pa celebra e dia nacional.

 

E dialuna siguiente Visibility Team a resumi e tareanan di patruya den cuadro di bishitanan di barco crucero, unda cu tabatin dos barco den waf, cu mas of menos 5800 pasahero. A papia cu tourguidenan pa keda tras di e heki na entrada di waf pa permiti pa e fluho di pasahero por tuma lugar sin molester.

Cu un barco den waf, cu 2500 pasahero, riba 21 di maart a tene un “post” n’e entrada principal di waf.

Dia 22 di maart a intensifica patruya un biaha mas, como cu tabatin tres barco, esta Navigator of the Seas, Mein Schiff, y Zuiderdam den waf. Aruba a ricibi mas of menos 9300 turista e dia aki, y Visibility Team tabata bon prepara cu patruya pa preveni molester y incidentenan no aceptabel.

 

A tene cuenta cu e tourguidenan bendiendo nan servicio, adictonan ambulante, y otro factornan cu por causa molester. A papia cu adicto ambulante J den cercania di Diamonds International y a pone bay for di e area aki.

Agentenan a intermedia na Renaissance Resort, unda cu un señora turista a declara cu el a laga un tas chikito cu carchi di banco, un cadena di oro y su pasport den e kamber cu e tabata kedando aden anteriormente, unda cu n’e momento ey ya caba tabatin otro turista hospedando.

El a pidi asistencia di Polis pa por bay den e kamber y busca su tas, cual a wordo haya bao di e cama.

Un total di 3500 turista a bishita Aruba riba dia 23 di maart riba barco Carnival Conquest. Visibility Team a patruya na pia den centro di Oranjestad, y na waf como e accion di prevencion rutinario.

 

E dia siguiente tabatin tres barco cu 5500 bishitante, y e patruyanan di custumber tabata activo. Na Royal Plaza Mall a topa cu un adicto ambulante conoci, esta “R”, y a papia cune. Tambe a combersa cu tourguides cu tabata causando molester.

Riba dia 25 di maart tabatin un barco den waf cu 3500 pasahero, e patruyanan rutinario a tuma luga, y no tabatin ningun incidente.

Durante di controlnan di trafico banda di Renaissance Hotel entre 35 auto cu a keda para pa control, Polis a duna ocho procesverbaal.

Visibility Team ta sigui cu e accionnan di patruya den Oranjestad den su rol preventivo.

Top