Vision pa un miho Aruba, segun Eric Alvin Conrad Ras di CURPA

Mi persona Eric Alvin Conrad RAS a wordo apunta pa partido CURP@ riba tereno di husticia. Riba 16 di november 1982 mi persona a drenta Cuerpo Policial e tempo ey di Antillas. Mi a traha na diferente departamento di Cuerpo Policial.

 

Actualmente mi ta coordinador na Bijzondere Verordening na Districto I cu ta Oranjestad. Tambe ta forma parti di e team di maneho di districto di Oranjestad (DMT) y na un paar di ocasion hefe suplente na Districto di Oranjestad. Mi tin e rango ta subinspector primera clase. Mi ta casa y ta tata di 4 yiu di cual uno a fayece na 2009 y tin 2 nieto.

Nos Cuerpo Policial Arubano tin 31 aña di existencia. Nos tur por corda di meneer Roland Peterson cu a papia di e 200 Polisnan cu a keda pais Aruba despues di Status Aparte.

Akinan nos por papia di Polisnan cu a sacrifica gran parti di nan bida pa sirbi e pueblo di Aruba. Nan a sacrifica nan famia y nan bida social pa sirbi nos pais Aruba, Ras ta splica.

 

Awe cu nos ta den 2017 nos por mira cu den e ultimo 10 aña no a recluta suficiente Polis cu awe nos por papia cu tin scarsedad di Polis. Tin un necesidad urgente pa tin mas Polis uniforma paso a nan ta e front line di nos Cuerpo Policial Arubano.

E motibo tras di e scarsedad aki ta bini cu na aña 2006 (Gobierno di MEP), na 2014 y 2015 (Gobierno di AVP) no tabatin opleiding pa Polis. Casi tur departamento di nos Cuerpo Policial tin falta di Polis pa funciona den miho forma. Esaki ta mesun erornan cu Gobierno den pasado a comete cu e opleiding di maestronan di scol ora a cera IPA, Ras ta mustra.

 

For di 2011 pa awor tin mas cu 40 Polis cu a baha cu un pensioen bon mereci. Edad di 60 aña ta un bon edad pa e Polisnan baha cu pensioen y disfruta pa locual nan a traha p’e.

Hopi di departamentonan di e Cuerpo Policial tin falta di personal pa duna un miho servicio. Nos no mester lubida cu na aña 1986 e poblacion di Aruba tabata 60.000 habitante y awe den aña 2017 nos tin doble e cantidad di habitante cual ta 120.000 habitante.

Esaki ta duna nos di compronde cu nos tin mas auto riba nos careteranan (72 mil), mas problema social y tambe aumento den criminalidad, Ras ta continua.

 

Antes den 14 luna di tempo nos tabatin un Polis cla pa subi caya y ta cuminsa traha den e Cuerpo Policial bao di su mentor. E diploma di polis di antes nunca a wordo evalua pa bisa ki nivel e tin. Awendia ta tarda 4 aña pa un Polis termina su estudio. Akinan caba nos ta mira cu tin un diferencia grandi pa nos tin un Polis cla pa cumpli cu su trabao di tur dia.

P’esey mes partido CURP@ den e proximo gobernacion lo bin cu 2 grupo (klas) di un opleiding pa Polis cu duracion di 14 luna y p’asina den periodo mas cortico nos por tin mas polis riba caya. Tambe mester mas docent na nos scol di Polis. Nos tin poco docente y nan ta bai un extra mile y haciendo un bon trabao. Nan tambe mester di ayudo, Ras ta remarca.

 

Pa Partido CURP@ e radar lo mester bin mas pronto posible p’asina nos por cera nos fronteranan. Cu e radar den funcion nos por cera nos fronteranan y asina por tin un miho control. E radar y combina cu e helicopter den accion e Polisnan por haci un trabao hopi mas efectivo y lo duna sigur un bon resultado. Nos Polisnan ta vigilando nos fronteranan pero e radar lo ta di gran importancia si nos ta desea di mira miho resultado. Asina nos por bringa e importacion ilegal di droga , di importacion ilegal di arma di candela y traficacion di hende ilegal. Dor di e tantismo atraconan cu arma di candela cu tin riba nos isla ta duna nos indicacion cla cu nos frontera ta habri. Nunca antes tabatin asina hopi arma di candela riba nos isla. Na es momentonan aki nos costanan ta habri pa tur sorto di traficacion. Den pasado tabatin e tragedia a tuma lugar cu traficacion di hende den Colony, Ras ta menciona.

 

Den e ultimo añanan nos no tabatin combatimento di droga riba tereno local. Nos ta mira cu e uzo di droga bao di nos hobennan ta birando alarmante y edad nan ta keda baha.

Algo mester wordo haci pa evita cu muchanan di 12, 13, 14 y 15 aña ta cay den e gara di droga. Nos tin aumento di adictonan cu ta subi cada dia cu pasa. Tin hopi adicto ambulante y mester hincanan den un lugar unda lo busca moda pa nan haya nan rehabilitacion, segun Ras.

 

Partido CURP@ lo trese cambio den e ley di curatela. Hopi di ladronicia den casnan ta wordo cometi dor di adictonan. Esey nos por midie ora cu nan ta deteni, e kiebro den cas y joy-riding ta baha y ora nan sali e kiebronan den cas y joyriding ta bolbe lanta cabes.

P’esey mes un cambio den e ley di curatela ta di suma importancia y tambe un lugar pa nan por haya nan tratamento adecuado. Esaki lo trese un alivio grandi p’e pueblo di Aruba.

Tambe partido CURP@ lo bin cu e ley di identificacion. E ley aki ta importante p’e Polis haci un miho trabao y mas facil pa identifica un persona y menor di edad (14 aña bay ariba), Ras ta continua.

 

Partido CURP@ lo basa su maneho rib’e parti preventivo y p’esey ta importante pa tin mas Polis riba caya. E visualidad di Polis riba caya combina cu tecnologia nos lo baha ladronicia, atraco y accidente den trafico.

Tur departamento di nos Cuerpo Policial Aruba ta den necesidad di mas personal pa nos por logra nos metanan nos dilanti. Visualidad di Polis uniforma lo yuda pa preventivamente baha criminalidad.

Nos tipline 11141 ta dunado bon resultado. Akinan ningun hende ta haya sa ken a yama. Sigi hasi uso di nos tipline.

 

Nos ta un isla chikito y tin demasiado atraco ta tuma lugar. Un atraco menos ta un trauma menos. Lo mester bin un departamento cu lo zorg pa pa hendenan cu a pasa den trauma asina nan por wordo rehabilita di nan trauma. Preveni ta miho cu lamenta, Ras ta termina.

 

Pa partido Curp@ e prioridad ta:

E radar pa tin un miho control na nos costanan;

Recluta mas hende pa bira Polis;

Combatimento di droga riba tereno local;

Combatimento di arma di candela ilegal;

Caombatimento di traficacion di hende (mensenhandel).

Top