Vupá fatal y monumental…… Curasoleño y Dominicano a mata hende robes na Maroko

WILLEMSTAD – E asesinato cu un Curasoleño hunto cu su cómplice Dominicano/Hulandes a cometé den fin di siman na Maroko ta parce un caso di ‘shoot straight but wrong’ caminda nan a bay pa mata un Marokano di baho mundo y a caba na asesiná yiu di un Presidente di tribunal na Maroko.

E duo a yega Marrakech for di Hulanda siman pasá pa regla cuenta di e criminal Marokano cu nan a haña encargo pa mata y unabes cu nan a localisé, nan a bay directamente negoshi di e victima y tiré den cabez.

 

Un eror chikito só nan a cometé: E homber cu nan mester a mata a lanta fo’i su stoel un par di minüut promé y ta hende robez nan a tira.

Nos no tin confirmacion cu autoridadnan Marokano a capturá nan caba aunke tin noticia ta circulá cu nan t’aden. E duo a cana subi terasa di e café y lòs varios tiro.

Liquidacion di un Marokano den fin di siman den un popular café den e bario Hivernage na Marrakech, Morocco, a causa hopi consternacion na capital di e pais Arabe y den circulonan criminal na Hulanda.

 

Polis Marokano ta sospechá promé cu ta un Curasoleño y un Surinameño a cometé e liquidacion y a circulá nan foto internacionalmente den fin di siman di e dos sospechosonan Shardyone Ulyses Girigorio Semerel, kende a nace dia 12 di sèptèmber 1988 na Corsou y Edwin R. Martinez di 24 aña di origen Dominicano.

Shardyone tin pasaporte Hulandes cu el a saca na Corsou y Edwin a saca pasaporte Hulandes luna pasá na Hulanda.

 

Despues di e liquidacion e dos Curasoleñonan a huy riba un Yamada TMAX for di café La Krem’é cu nan a bandoná na un landfill.

E crímen a causa mas consternacion ainda, pasobra ta hende robez e dos Curasoleñonan a liquidá y tabata no menos cu e yiu homber di 26 aña di un Huez di Tribunal Superior Marrakech.

Manera e liquidacion a tuma lugar, fuentenan di baho mundo a circulá e noticia cu a causa consternacion den baho mundo na Amsterdam caminda tin hopi Marokano den criminalidad.

 

Poco despues e propio Minister di Interior Marokano, Abdelouafi Laftit, a confirmá Hamza Chaib di 26 aña a bira victima di e liquidacion.

E dos matónnan a selectá e victima conscientemente segun personal di e café y nan a tiré dirigi den su cabez.

Un amigo di e victima mortal y dos otro hende tambe a sufri herida den e ráfaga di bala cu e duo a lòs.

Chaib tabata studiante di medicina y su tata ta Presidente di e Tribunal Superior n’e ciudat Beni Mellal.

Polis a arestá nan caba y a confirmá cu ta pagá nan tabata pa mata doño di e café.

 

FAYO GARAFAL

E criminalnan a faya den nan intento, pasobra doño di e café a bandoná su negoshi algun minuut promé cu nan a yega y e matónnan no a busca drechi y a mata e studiante. Polis a arestá doño di e café tambe por si acaso.

Esaki ta promé biaha cu autoridadnan Marokano ta haña nan ta atendé cu un caso di asesinato contratá y pa colmo nan a traha balchi cu e caso, pero mester tin misericordia for di awor pa loke nan ta bay sufri na man di autoridadnan Marokano.

 

 

 

Marokano bibá  na Hulanda a paga duo di sikario pa mata su enemigo

 

WILLEMSTAD – E caso di asesinato di un studiante cu dos Curasoleño a tira mata riba terasa di un café na Marrakech na Maroko casi sigur ta riba instruccion di un Marokano cu ta biba na Hulanda.

En todo caso origen di e problema cu a caba asina fatal ta na Hulanda.

E homber mes cu nan tabata busca pa mata ta un criminal Marokano cu nacionalidad Hulandes tambe.

 

Directamente despues di e asesinato autoridadnan Marokano a aumentá vigilancia na tur haf y aeropuerto y a distribui foto di e dos sospechosonan y di e crimen.

Autoridadnan Marokano a informá cu e duo den pasado tabata envolvi cu traficacion di droga, atraco y intento di asesinato.

E dos hombernan a keda den dos hotel separá banda di e café y personal di e café a mira nan repetidamente den becindario.

Esta cu e hecho cu tur dos tin dreadlock cu ta yega te na nan co’i sinta no ta yuda camufla nan apariencia.

 

Den baho mundo na Amsterdam nan no ta hende notorio. Shardyone Semerel na mei di 2007 a atracá un hende cu un pistol di plastick na Amsterdam, pero mucho mas cos no ta conocí di nan dos. Nan a identificá nan riba e video di cámera di seguridad di e café.

Nan tabata bistí tur na preto cu hèlm integral cu ta tapa nan cara totalmente.

E homber cu nan mester a mata t’e criminal Marokano-Hulandes Mustapha ‘Mous’ el F. òf su ruman Mohammed, pero Polis a interogá nan caba na Casablanca caminda nan a huy bay.

 

Mustapha el F. a sali for di e grupo cu tabata traha p’e traficante  Samir ‘Scarface’ Bouyakhrichan kendee nan a liquidá na 2014 y kende tabata super rico.

E tin varios café-bar na Maroko y tabata doño di e club No Limit cu alcalde di Zoetermeer a laga sera. E club tabata mashá gustá pa criminalnan.

Den e caso aki cu ta trata di asesinato di yiu di un Huez, Polis a traha super eficiente y no solamente a arestá e dos Curasoleñonan, pero nan sa pa 80% ta ken a duna òrdo pa cometé e liquidacion.

 

Esey lo ta un Marokano kende ta kedando na Santo Domingo, pero nan a notificacion pa aresté caba.

E atentado a causa masha intranquilidad den baho mundo na Amsterdam, pasobra nan sa cu tengla di Polis Marokano ta largo como pais Arabe caminda nan tin cooperacion di cuerponan potente manera di Dubai caminda criminalnan internacional por a bay keda den relativo tranquilidad basta nan no cometé fechoria.

Mustafa F. tabata biba na Amersfoort y tin nacionalidad Marokano, pero algun aña pasá autoridadnan a deporté for di Hlanda. Nan tabata sospeché den varios caso di liquidacion, pero nunca a hibé dilanti Huez.

Unico fechoria pa cual a condené ta pa posecion ilegal di arma pa cual a condené na dos aña di prizon.

 

‘Moes’ ta mashá conocí na Marrakech caminda e ta core den auto masha caro y ta doño di masha propiedad.

Leave a Reply

Top