Watty Vos Boulevard a cuminsa

Despues di ta planeando pa mas di 40 aña, diabierna ultimo den oranan di mainta a cuminsa cu e trabaonan preparatorio di e Fase 1 pa construccion di Ringweg 3 “Watty Vos Boulevard”.

Durante di e ultimo añanan nos poblacion a aumenta substancialmente, alabes e cantidad di auto pa cada famia tambe a aumenta.

Combina cu e cantidad di vehiculonan di servicio, di comercio y industria, e capacidad di nos careteranan pa atende cu e aumento di fluho trafico a agota.

Pesey mes for di decadanan pasa a premira cu un ringweg nobo lo tin cu ser construi pa distribui e trafico di futuro.

Awe e futuro ey a yega y e trabaonan a cuminsa pa construi e di tres ringweg rond di Oranjestad.

 

E trabaonan preparatorio ta ensera cu den diferente area lo tin cu remove tera, piedra y matanan cu tin riba e ruta cu a planea p’e caretera y su infrastructura.

Sinembargo un estudio profundo a ser haci di tur locual tin cu ser removi pa recompensa e naturalesa bek cu plantamento di matanan local cu su tera y piedranan cu ta cuadra cu su ambiente.

Directie Natuur en Milieu (DNM) hunto cu DOW y Santa Rosa (DLVV) lo traha hunto pa monitor e desaroyo di contruccion y tambe e ehecucion di plan pa recompensa naturalesa bek.

 

Mescos cu a sosode p.e. n’e diferente otro proyecto recien construi manera e diferente Linear Parknan. Regularmente DOW lo duna informacion na comunidad di e progreso di e trabaonan relaciona cu proyecto importante aki pa nos isla.

Ringweg 3 Watty Vos Boulevard lo diversifica e distribuicion di trafico for di nos Aeropuerto pasando den diferente bario rond di Oranjestad te na cruzada na Guardian – Sun Plaza. Ta bay tin reto y dificultadnan durante di construccion y for di awor DOW y e contratista Mota-Engil ta pidi comunidad comprencion, pasenshi y cooperacion pasobra na final e recompensa lo trece alivio grandi y oportunidadnan nobo pa progreso pa henter nos comunidad.

Top