Wente Vineyards preparando p’e di 12 Torneo di Golf anual na Aruba

Wente Vineyards un biaha mas ta trahando hunto cu Arion Wine Company y Papiamento Restaurant pa su di 12 Torneo di Golf anual, cual lo tuma lugar diasabra, 8 di april na Tierra del Sol Golf Course, e cancha di golf ganador di premio, diseña pa Robert Trent Jones II, cu un shotgun start cuminsando pa 12:30pm.

 

Prome cu e torneo mes tuma lugar, Eric Wente, e di 4 Generacion di Productor di Biña y Director di Hunta Directiva di Wente Vineyards, lo yega riba e isla pa varios actividad, incluyendo reunionnan cu doñonan di restaurant, e presentacion di un seminario di combinacionnan di cuminda y biña p’e studiantenan di Universidad di Aruba, ademas di duna un presentacion n’e ekipo di Ruth’s Chris Steakhouse.

 

E biña tambe lo wordo saborea durante e torneo su Recepcion di Bon Bini tradicional pa participante y sponsornan, cual un biaha mas lo ta presenta pa Papiamento Restaurant.

Ya pa 5 generacion, famia Wente ta dedica n’e arte di produccion di biña y n’e filosofia cu e calidad di un biña ta origina den e biñero.

Awendia, e Productor di Biña di e di 5 Generacion, Karl D. Wente ta sigui carga e tradicion familiar di traha biña y sostenebilidad cu ta extende den henter e organisacion, incluyendo tres biñero di estado, esta The Course at Wente Vineyards, The Restaurant, The Concerts y tur otro aspecto di e estado.

 

E torneo anual di golf di Wente Vineyards – Papiamento Restaurant e aa aki lo ta recaudando fondo pa Fundacion Guia Mi, un fundacion cu ta ofrece proteccion na menornan di edad, kendenan a sufri di negligencia, abuso fisico of abuso sexual.

Fundacion Guia Mi su trahadornan social ta wordo apunta pa un huez pa sirbi como un voogd familiar; guiando e hoben of mucha, nan famia y otronan envolvi, cu e meta di resolve problemanan familiar p’asina e mucha por biba cu su mayornan sin guia of supervision.

 

Despues di e torneo, participantenan lo bin hunto n’e piscina di Tierra del Sol Club House pa un buffet, prepara pa The Restaurant na Tierra del Sol, y un ceremonia di premiacion cu sr. Oliver Riding y sr. James Kiley di Tierra del Sol Golf Course.

E premio p’e prome lugar ta un biahe ida y buelta pa San Francisco, CA pa hunga golf y hospeda na Wente Vineyards den e Livermore Valley.

Cu mas di 130 participante registra pa hunga golf, nos ta sigur cu e torneo lo ta un dia memorable.

Top