Yvette Geerman di Departamento di Salud Publico ta adverti: Ta controla pisa riba cumplimento cu reglanan di higiena, specialmente durante temporada di Carnaval

 

 

 

 

 

 

 

 

 

 

 

 

Durante temporada di Carnaval ta realisa diferente control specialmente na eventonan grandi unda ta bende of prepara cuminda.

Departamento di Salud Publico (DVG) ta basta activo den e temporada aki y nan Seccion “Dienst Warenkeuring en Hygiene” tabata presente durante e Caiso & Soca Monarch.

 

Yvette Geerman di Seccion “Dienst Warenkeuring en Hygiene” a duna di conoce cu nan tabata presente den diferente actividad cu a tuma lugar, manera e pre-finalnan di Caiso & Soca Monarch, Parada di Mucha na Noord etc..

Locual nan ta haci ta controla si e cumindanan cu ta wordo prepara n’e forma corecto, si durante preparamento e proceso e ta wordo haci na un manera pa evita cu algo por bay robes y cu un hende por bira malo, esta proteha comunidad di alimento cu por haci nan malo.

Personal di Seccion “Dienst Warenkeuring en Hygiene” a haci nan inspeccion y a controla e cushina- y barnan durante e evento.

 

Segun Yvette Geerman, DVG ta hopi satisfecho. E carchinan di salud tur tabata na ordo y a constata cu a cumpli cu regla di higiena manera stipula. A controla tambe temperatura di e cuminda, p’e cuminda ta n’e temperatura adecuado. Esaki ta un di e factornan cu por pone cu e cuminda ta bomba of daña.

Durante e inspeccion a duna nan e tipnan y e guia corecto pa por mantene e temperatura corecto.

 

“Como Salud Publico nos t’ey pa proteha comunidad eyfo y esey ta locual nos ta haciendo. Durante añanan nos ta dunando informacion, tips, sugerencia”, e hefe encarga cu Seccion di “Dienst Warenkeuring en Hygiene” a duna di conoce.

El a remarca cu tur ta bayendo den un bon direcion. No a yega ainda unda mester ta, pero ta hopi satisfecho como salubridad publico y nan lo sigui guia unda cu mester.

 

Durante e actividadnan di Carnaval cu ta bin DVG lo sigui cu e inspeccion pa garantisa cu ta cumpli cu reglanan di higiena y si ta cumpli cu ley, tanto riba e rutanan di Carnaval como durante e actividadnan den e lugarnan manera stadion, asina Yvette Geerman di e Seccion di “Dienst Warenkeuring en Hygiene” a duna di conoce.

 

 

Top