Yvette Geerman, Hefe di Dienst Warenkeuring en Hygiene di DVG: Ta importante pa evita cuminda contamina durante campamento

Nos ta den e temporada masha gusta di campamento. En conexion cu e temporada aki, departamento di Salud Publico ta pone atencion na esunnan cu ta bay campa pa no neglisha e importancia di siguridad di cuminda den e temporada aki.

Yvette Geerman, Hefe di Dienst Warenkeuring en Hygiene di DVG, a remarca cu nan tin algun tip pa campadonan pa pone atencion riba dj’e p’asina nan por evita di bira malo dor di cuminda.

 

Mescos cu na cas aworaki durante campamento, corda bon cu tur cuminda cayente mester mantene cayente. Cu cayente ta referi na un temperatura di 65 grado of mas ariba, Geerman a remarca. Cumindanan friu mantene nan friu, na un temperatura di 5 grado of bou di 5 grado. Corda di hiba un jug cu hopi ijs of gel pack cu asina por warda cuminda friu den dj’e.

 

“Planifica bon ki tipo di cuminda bo ta bay hiba den e temporada di campamento y con lo bo bay prepara e cuminda e temporadanan aki”, el a remarca. E cumindanan di bleki p’e temporada aki lo ta ideal pa ora bo ta pafo di cas. Cumindanan di bleki DVG ta referi carni bleki, tuna, sopi di bleki, lechi polvo, por bay cu fruta seco y noot cual ta cosnan hopi ideal p’e temporada.

 

“Si acaso ta hiba carni campamento, corda semper hiba carni den jug cu hopi ijs.

Asina por warda carni bon y con bo ta warda nan. Y na momento cu bo ta warda cu nan ta hiba jug cu ijs, gel pack, corda paketa e carni bon, evita p’e por haya contacto cu awa cu ya a cushina caba pasobra asina por haya contaminacion den dj’e, Geerman a remarca.

Mester zorg pa warda e jug unda solo no ta cay riba dj’e. Evita di habri e jug di carni of cosnan friu constantemente pa por mantene e carni eyden friu. Ta ideal pa pre cushina e carni, pasobra ya a pasa un proceso y ta core menos risico.

 

Na momento cu bo kier bay haci uzo di grill, corda semper uza tur material cu ta limpi, specialmente e tabla di corta. Si ya caba tabatin un cuminda curu riba dj’e, no uz’e bek pa un cuminda limpi, el a indica. Si ta bay haci uzo di grill y e carni ta friu, lag’e den jug te ora mester sak’e pa pone riba grill.

 

Mester corda cu mannan mester ta limpi, laba mannan bon prome cu prepara cuminda.

Si a haci uzo di baño, semper laba man bon. Ora sirbi cuminda, no laga esaki para pa mas di 2 ora. E temperatura ta calor, e zona peligroso ta entre 5 grado y 65 grado.

Asina cu e cuminda ta den e temperatura ey, tin e risico cu bacterianan por multiplica mas lihe.

 

Tin 5 punto cu mester pone atencion ora di limpiesa; semper laba man y laba tur ekipo cu ta uza pa cushina; separa cuminda curu for di cuminda cushina y evita contaminacion; no uza e mesun tabla cu a uza pa cuminda curu p’e cuminda cushina; mantene loke ta cushina na e temperatura ideal. P. e. hamburger mester yega 70 grado.

Carni mula tambe mester ta 70 pa 72 grado Celsius. Lo ideal ta cu lo por bay cu un thermometer p’asina por mira cu ta cushinando bon; bay cu productonan cu e fecha no a vence. Laba berdura y frutanan bon.

 

Bay cu hopi awa den e temporada aki. Si tin algo cu por a bay robes esta come cuminda cu a daña semper y cuando acudi na Eerste Hulp. Nos como departamento di Salud Publico, di locual nos ta desea esunnan cu ta bay campa, dianan hopi placentero.

Mas bo conoce e reglanan di higiena di alimento mas bo por preveni, asina Yvette Geerman a termina bisando.

Top