Director di Departamento di Salud Publico, drs. Jerry Staring: Aruba a registra un total di 298 caso confirma di Zika

E topico di Zika a trece poco speculacion. Director di Departamento di Salud Publico, drs. Jerry Staring a splica pakico a duna cierto dato y algun no.

DVG a registra algun caso confirma di e enfermedadnan aki. E casonan confirma di laboratorio ta indica cu tin 1 caso di Dengue, 12 caso di Chikunguya y 298 caso di Zika.

 

“E pregunta si nos ta den un outbreak. Si. Awor nos por bisa cu nos tabatin un outbreak. Ta hopi importante pa tene cuenta, cu ta papia di un outbreak a base di standard internacional,” asina Jerry Staring a remarca.

Tin cierto regla na ki momento ta yama algo outbreak. Diabierna siman pasa DVG a haya e dato cu ta yega n’e standard internacional di outbreak, na Papiamento epidemia. Esey no ta kita afo cu a tuma e medidanan necesario y cu e cifranan aki ta bin simannan despues.

 

Tin confirmacion di Zika, pero e “bevestiging melding” via laboratorio ta tarda. A haya melding di e “zorg aanbieders”, e dokter, parteranan, Eerste Hulp y nan ta tarda. Ora e muestranan tin cu bay laboratorio pa haya un confirmacion, e tin su proceso pa cana y e ta dura por lo menos 2 siman mas pa confirma un caso si e ta Zika of no.

For di aña pasa na november nan ta ocupa cu e plan nacional, tur e pasonan y a aumenta e accionnan.

 

Hefe interino di Departamento di Epidemiologia, ing. Eugene Maduro a indica cu nan tin registra 1185 casonan sospechoso cu di dunadornan di cuido a raporta.

Aki ta trata di casonan di personanan cu ta presenta sintomanan di keintura, rash, dolor di cabes, cu por indica cu ta trata di un enfermedad transmiti pa sangura.

Den e caso aki t’e enfermedadnan cu nan ta vigilando cu ta Dengue, Zika y Chikunguya.

E casonan registra y cu ta sospechoso ta mas den e areanan di San Nicolas, Savaneta, Santa Cruz y Pos Chikito. Y esakinan no ta casonan confirma pa laboratorio.

 

Tin mas hende muher cu a notifica riba e enfermedad aki y DVG ta pensa cu esaki ta pa motibo cu e ser femenino ta yega dokter mas liher cu hende homber. 65% di e casonan sospechoso ta entre personanan di edad 25 pa 64 aña.

E sintomanan mas tanto cu DVG tin registra ta 1/3 parti di rash, 1/3 di keintura y mas tanto ta dolor di cabes.

 

E cifranan a cambia di un siman pa otro ta pa motibo cu DVG mester a cambia e datonan cu nan tin registra.

E cifra a cambia tambe pa motibo cu aña pasa tabatin 1 test so cu ta PCR y desde 1 di januari 2017 nan a bin cu un test comercial cu por test Zika. Esey a pone cu e cantidad di Zika a subi drasticamente.

 

Mientras cu GKMB ta haciendo su maximo esfuerso pa spuit den barionan y controla areanan potencial pa forma criadero, ta importante pa comunidad tambe controla den nan mesun cas, unda ta sospecha cu tin hopi criadero di sangura.

Check tur caminda cu tin awa para, manera pochi di mata, florero y asina por sigui menciona. Si nos tur combati sangura, nos elimina criadero, automaticamente nos ta preveni enfermedadnan manera Dengue, Chicungunya y Zika.

Top