A asigna un localidad di deposito nobo pa Ecogas bou supervision di Serlimar

Den e proceso pa determina e caminda cu ta bay wordo cana pa nos por sanea e situacion di desperdicio aki na Aruba, tin un steering committee cu ta trahando pa bin cu un plan di con den 90 dia lo bay tuma un decision a corto plaso cu Parkietenbos.

Pareu cu esaki tin un comision canando cu ta bou di encargo di TNO dirigi pa PwC pa garantisa transparencia, asina Minister Otmar Oduber a anuncia.

Finalmente lo mester yega n’e decision pa sera Parkietenbos y bay over na loke ta encera e forma nobo di procesamento di sushi aki na Aruba.
Relaciona cu esaki, fin di december a laga publica un Decreto Ministerial caminda cu pa prome biaha ta designa un area cu no ta Parkietenbos, oficial y legalmente como un stortingsplaats, e sitio aki ta na Sero Thijshi.
Ta manda un mensahe pa tur esnan cu ta tira sushi na un forma ilegal na diferente sitio rond Aruba pa varios aña, cu esaki absolutamente no lo wordo tolera mas.

E ta limita entrada di Serlimar y 2. Cu ta crea e mecanismo di control pa evita daño na salud y na medio ambiente. A yega na un acuerdo cu compania Ecogas cu t’e compania cu ta compacta e sushi y ta pone den bulk cu tabata wordo dera na un forma ilegal, aworaki a yega na acuerdo cu nan lo deposita esakinan na Sero Thijshi cu lo tuma lugar bou supervision di Serlimar cu ta keda e compania cu ta percura pa maneho di desperdicio di sushi aki na Aruba.

Den e Decreto Ministerial ta poni central cu sin importa cua decision wordo tuma pa loke ta maneho di desperdicio aki na Aruba, cu Serlimar ta keda e compania cu lo percura pa recoge sushi y maneha e sushi na Aruba.

E forma sin control cu tabata deshaci di e bulk nan y e riesgonan cu esakinan por ocasiona si esakinan bay dor di tera y den awa ta un di e motibonan cu a tuma e paso pa regula e deposito cu ta dump e bulk nan.
PAHO lo bin Aruba e luna aki pa re-confirma cu e proceso cu a scoge ta cuadra cu e puntonan cu nan ta pone padilanti.
Tambe testnan lo wordo haci riba e bulk nan pa verifica cu esakinan no ta toxico pa comunidad dor di pone nan den tera.
E cambionan aki ta cay bou di e compromiso cu Gabinete Wever – Croes tin, cual ta pa pone e ser humano central.
Den e cuadro aki kier garantisa y evita cu daño ta wordo haci na nos salud y medio ambiente aki na Aruba, segun Minister di Medio Ambiente, Otmar Oduber.

Leave a Reply

Top