A entrega “Assessment Report” cu ideanan pa mercadea compleho deportivo – Fundacion Lotto pa Deporte a celebra ceramento di aña cu ASU

Fundacion Lotto pa Deporte y Aruba Sport Unie a bin hunto pa celebra clausura di aña 2017. N’e celebracion aki a conta cu e presencia di algun federacion y asina a cende e pagara pa bisa e aña ayo.

Tur esnan cu tabata presente a disfruta di un atardi ameno, unda a come, bebe y recorda con aña 2017 a bay. Tambe Fundacion Lotto pa Deporte a entrega Aruba Sport Unie un “Assessment Report” di PriceWaterhouseCoopers.

 

Fundacion Lotto pa Deporte tabata presente n’e seramento di aña di Aruba Sport Unie (ASU), unda cu nan a presencia e tiramento di pagara y a disfruta hunto cu tur esnan presente di e cantica di Dande.

Director di Fundacion Lotto pa Deporte, mr. Di-Stefano Wernet RA, a expresa di a mira aña 2017 uno hopi positivo y p’e aña 2018 nan lo sigui traha p’e bienestar di e mundo di deporte di Aruba. FLpD tabatin un bon cooperacion cu ASU, unda cu nan a verf e edificio y pone airco tambe.

 

Nan a entrega e raport di PriceWaterhouseCooper (PWC) na Presidente di ASU. El a expresa cu e raport ta ensera con pa haci mas uzo di e compleho deportivo y con pa atrae mas fanatico den e lugarnan aki.

Tambe con pa haci mercadeo y gana cierto placa den e compleho deportivo pa yuda den aporte di contribucion pa gastonan di mantencion. Asina aki por haya otro mercadeo y ta baha e huur di e compleho deportivo pa yuda deporte bay dilanti.

 

Gerald Franca, Presidente di ASU y Piscina Olimpico, a indica cu aña 2017 tabata uno fructifero, di cual esaki tabata uno bon. Tur esaki a bin pa motibo di e parti cooperativo cu ASU a haya for di FLpD, specialmente p’e edificio di Centro Deportivo Betico Croes tabata tremendo.

ASU a cuminsa verf e edificio parti paden, unda cu nan a cumpra 2 airco nobo di cual hopi hende tabata keha di calor.

“E cooperacion cu nos a haya di nan tabata tremendo. E trabounan ta sigui y e cooperacion cu nos a haya pa parti di piscina ta mescos”, asina Gerald Franca a expresa.

 

Dentro di 2 pa 3 siman e construccion p’e piscina lo ta tumando lugar, cual FLpD a pone e placa disponibel pa bay via e organisacion p’e piscina.

ASU ta spera cu e piscina lo keda manera nan ta desea y di e forma mas optimo, cumpliendo cu e necesidadnan di Federacion Internacional di Natacion (FINA).

Gerald Franca a expresa cu nan ta ricibi subsidio pa haci curso y tambe nan no ta cobra federacionnan, pasobra FLpD ta pone e placa disponibel.

 

E miembro di e fundacion mes ta dicta e curso, di cual e Presidente di Piscina Olimpico ta percura pa conscientisa e federacionnan riba e importancia di comunicacion cu ta existi entre e directiva, entre mayor, entre coachnan, atleta y fanaticonan.

 

Ta hopi importante pa sa cua t’e canalnan pa uza y con pa yega n’e fanaticonan directamente ora tin un actividad andando.

Por tin diferente actividad andando y e federacionnan no tin e fondo pa promove algo hopi grandi, pero ta trece esaki na conocemento di e publico general cu ta haci uzo di e facilidadnan.

 

“Mi ta gradici Lotto p’esey, pasobra nan ta constantemente mi tras pa dicta e curso aki”, asina el a expresa. ASU lo sigui acerca e federacionnan pa yuda nan den e preparacion den e area mercadeo, asina Gerald Franca a expresa.

 

 

Leave a Reply

Top