A haña di 5 kadaver awe mainta…… Por lo menos 16 hende a sobrebibi noufragio

WILLEMSTAD. Di akuerdo ku informashon for di estado Falcon na Venezuela i relatonan di prensa venezolano dje region, por lo menos 16 persona venezolano a logra sobrebibi e noufragio dje lancha ku a biaha ku 30 persona a bordo i a bin dal kibra den baranka na Koraal Tabak.

Kuater persona a muri i awe mainta a drenta notifikashon ku outoridatnan a lokalisá un kadaver mas na Noordkant. Gregorio Montaño kende ta direktor di Protección Civil na Estado Falcon, a informá prensa ku 11 famia a konfirmá pa su despacho ku nan tabatin kontakto ku nan famia ku tabata bordo dje lancha.

Ku otro palabra, nan ta na Korsou na bida. Ela rekonosé ku nan ta skondí pasobra nan a drenta Korsou ilegalmente. Originalmente e funshonario a splika ku te ku ayera nan tabatin konfirmashon di 4 morto ku a bin pega riba baranka i ku polis a detené dos homber ku tabata kana ku paña muhá i nan a klasifiká e otronan komo desaparesido pasobra nan no tabatin ningun dato di nan.

Te ku ayera mainta nan a haña konfirmashon ku tin 16 na Korsou. Kada tres ora nan ta haña dato riba desaroyo dje investigashon. E funshonario a rekonosé ku pa motibu ku Maduro a sera frontera via maritimo i aereo, nan man ta mará pasobra nan no por sali pa tene kontakto ofisial.

Riba e kantidat di hende bordo dje lancha tabata sirkulá masha rumor pero afortunadamente ta resultando ku un mayoria ta na bida pero skondí. Loke a splika nan ta ku e lancha a daña i esei a pone ku ela dal kontra baranka na Noordkant kousando un tragedia dje tamaño asina.

E gobernador di Falcon, Victor Clark, a informá ku nan ta trahando ku outoridatnan internashonal (?) pa resolvé e kaso mas pronto posibel. E gobernador a bisa ku nan ta trahando ku tur instansia na Venezuela i Korsou riba e kaso pa trese e kurpanan Venezuela pa nan entiero.

Manera menshoná anteriormente,  awe mainta a haña un di sinku kadaver malamente maltratá posiblemente pasobra su kurpa a dal durante varios dia kontra baranka i despues a keda eksponé na solo.

E gobernador a pidi hubentut di estado Falcon pa reflekshoná i pensa bon pa nan no riska nan bida. E problema ta ku hubentut di Venezuela ta preferá di hasta muri i no keda biba bou di un estado di hamber, kriminalidat i malesa manera ta reina na Venezuela. E ta spera ku esnan ku a sobrebibi lo duna testimonio i konta kiko a pasa.

Per e ta lamentá e pèrdida ireparabel di hobennan di Falcon pa falta di kapasidat pa manehá un lancha ku a kousa un final tan tragiko. E periodista falconiano Jessica Urribarri a papia ku e alkalde dje Munisipio Colina, Argenis Leal, kende a dekreta tres dia di rouw pe tragedia ku a sosodé den laman di Korsou. E tambe a raportá ku nan ta trahando fuertemente pa repatriashon dje kadavernan.

Awor aki nan ta negoshando ku kompanianan di aviashon venezolano pa bin Korsou bin buska e kadavernan pasobra presidente Maduro a sera tur porta di salida for di Venezuela pa Korsou i vise versa. E alkalde a skòrs inisio dje karnaval den Munisipio Colina ku mester tuma lugá mañan komo muestra di respèt pe pèrdida di bida humano.

Finalmente ela roga e famianan ku a pèrdè un yu pa nan buska nan refugio den religion pa nan haña trankilidat mas rapido posibel.

Leave a Reply

Top