Acusado ta nenga asesinato den Rancho pero su DNA a wordo haya riba un arma cu sanger

E di dos acusado envolví den e caso di tiramento fatal na Ranchostraat, dia 24 di april 2016, despues di un atraco, ta Gerard E. Den e caso aki su supuesto complice ta e Venezolano Noel J., kende ta wordo bisa a yega di mata un persona na Venezuela y ta sintando un castigo di 7 aña pa atraco cometi den Koningstraat.

E victima den e caso aki ta e Colombiano “El Capitan”, cerca kende, segun e procesverbaal ta bisa, nan a bay cumpra droga y despues a trata di horte. Door di esaki no a logra, Gerard E. lo a tira e homber mata.  Esaki ta puntonan cu a wordo treci diabierna ultimo den e procesverbaal.

Con  e Polisnan a yega na e acusado aki? Un adicto na e sitio, Tico Spanner, a mira tur loke a pasa y den e PV ta para cu el a señala Gerard como un di e atracadonan. E otro acusado Noel mes a declara cu ta Gerard cu un otro Colombiano a mata Capitan, y cu esaki e propio acusado Gerard a cont’e esaki. Pero tambe un homber cera den KIA, kende a declara cu Chico E. a cont’e cu su yiu a tira hende mata den Rancho. Pero na momento di tratamento di e caso diabierna ultimo, tur tres persona a cambia nan declaracion, o sea a hala atras y ta bisa cu Gerard no ta envolvi. “Esaki ta logico,” fiscal a bisa. “Aruba ta un isla chikito y tur hende conoce otro. Ademas, recherchenan mes ta bisa cu hopi biaha menasa ta sali for di KIA.”

Esey ta e motibo cu a yama e testigonan pa bini den Corte. E detenido P. a bisa cu no ta berdad cu el a declara cu Chico a cont’e e cos ey. Y Tico tabata duda un rato, e no ta corda cos, y despues ta bisa cu e no ta sigur.

Loke cu Ministerio Publico a recoge den e investigacion aki tabata cu den un caha fuerte na cas di un Venezolano, envolvi tambe den e atraco den Koningstraat, a haya un arma di candela den un caha fuerte. E arma aki a wordo manda Hulanda pa Instituto Forensico haci investigacion riba e sanger cu tabatin riba e arma. Polisnan a canta BINGO ora cu e resultado a drenta. E DNA ta mustra cu esaki tabata di e acusado Gerard E.  Tabatin un otro DNA mas pero nan no a saca afo di kende e ta.

Gerard ta nenga tur cos y el a bisa cu ta solamente un biaha e tabatin un arma den su man y esey tabata ora cu un Venezolano a mustr’e esaki, pa mira si e kier cumpr’e. “Pero mi no tabatin placa. Por ta ora cu mi a wanta e arma den mi man, mi marca a keda riba dje.” Esaki caba ta un contradiccion, pasobra Gerard ta sintando un castigo di 18 luna pa posesion di arma di candela.
Fiscal a mustr’e tambe un potret di un persona cu un arma di candela den su man, pero ta su brasa so por mira. E acusado a admiti cu esey ta y e unico biaha cu e tabatin un arma den su man. Pero Fiscal a sorprende cu cu varios potret di e mesun persona na diferente ocasion cu diferente arma den su man  hasta handgranaat. “E number di e telefon aki ta di bo,” Fisca a bisa. El a admiti esey y na mesun momento a splica cu e ta presta hopi hende su celular.

Tambe Fiscal a lesa diferente mensahenan cu a saca for di su celular y tur cos ta indica, segun e representante di Ministerio Publico, cu e ta bende arma di candela. Pesey tambe den e acusacion a pone cu den e periodo di prome di december, 2016 pa januari, 2017 e tabatin diferente tipo di arma den su poder.

Den e caso aki, no tin duda pa Fiscal cu e ta complice den asesinato intencional (moord) pa cual a pidi Corte impone un castigo di 18 aña incondicional. Dia 5 di januari Corte lo dicta sentencia den e caso aki.

Top