Adaptacion di tarifanan di coriente y awa di bebe entrante 1 di janüari 2018

ORANJESTAD – E Autoridad Consumidor y Mercado (ACM, Autoriteit Consument en Markt) entrante 1 di janüari 2018 ta stipulá e tarifanan máximo nobo pa coriente y pa awa di bebe na Sint Eustatius.

Ta trata di e tarifa di uso fiho y e tarifa di uso variabel cu STUCO entrante 1 di janüari 2018 maximalmente por cobra e consumidor pa cubri e gastonan di e produccion y suministro di coriente y awa di bebe. Tambe ACM ta stipulá e tarifa di coneccion y reconeccion di nobo pa 2018.

 

ACM a base di e ley coriente y awa di bebe BES tin e tarea pa stipulá tarifa cu ta cubri gasto. Esaki kier men cu ACM a calculá loke ta costa STUCO pa producí coriente y awa di bebe y suministrá n’e consumidor.

Teniendo cuenta cu e pagabilidad di coriente y awa di bebe pa especialmente cas di famia chikí, e Ministerionan di Asunto Económico y Clima y Infrastructura & Maneho di Awa a pone subsidio disponibel pa baha e tarifa di uso fiho di coriente y awa di bebe.

 

CAMBIONAN DI TARIFA

Na Sint Eustatius e tarifa di uso variabel pa coriente ta baha di 0,30 USD/kWh pa 0,28 USD/kWh, pa motibo cu a cuminsá usa fase dos di e parke solar. E tarifa di uso fiho pa coriente ta subi cu 9% pa motibo di e aumento di gastonan di STUCO p’e distribucion di coriente. Ministerio di Asunto Económico y Clima a pone subsidio disponibel pa mantené e tarifa di uso fiho p’e dos capacidadnan di coneccion di mas chikí n’e mesun nivel cu na 2017.

 

Pa awa di bebe e tarifa di uso variabel na Sint Eustatius ta subi di USD 7,70 pa USD 8,34 pa meter cúbico di awa di bebe. Cu subsidio di Ministerio di Infrastructura y Maneho di Awa e tarifa di uso fiho entrante 1 di janüari 2018 ta keda USD 6,85 pa luna.

E gastonan tras di e red pa cada coneccion a subi. Esaki ta pasobra STUCO tabatin gasto (a invertí) den produccion di awa di bebe y pasobra e gastonan di mantencion di e red di awa di bebe a subi.

 

LEY CORIENTE Y AWA DI BEBE BES

Dia 1 di jüli 2016 e ley di coriente y awa di bebe BES a drenta na vigor. Tin 4 tipo di tarifa: E tarifa di coneccion, e tarifa de reconeccion (despues cu a desconectá), e tarifa di uso fiho y e tarifa di uso variabel.

ACM riba 1 di jüli 2017 pa promé biaha a stipulá e tarifanan máximo aki pa Sint Eustatius.

 

 

 

 

Leave a Reply

Top