Aruba a disfruta di un tremendo Festival yena cu Caiso y Soca original

Diasabra ultimo, Aruba Caiso & Soca Monarch 2018 tabata simplemente exitoso. Stichting Musica a logra pone un espectaculo fenomenal riba pia na Carnival Village. Aruba Caiso & Soca Monarch 2018 a wordo bendiciona cu varios yobida di awacero, pero asina mes a sigi cu un publico grandi y bon anima.

 

Den oranan di madruga, Aruba a conoce su Caiso & Soca Monarch pa 2018. Mervin “Blacky” Baptiste a resulta e ganador maximo den e categoria di Caiso cu e cancion “It’s Because Ah Black” (composicion y areglo: Adolfo Richardson) y e Soca Monarch a keda den nomber di Tony “T-Money” Mingo cu e cancion “Sideliners” (composicion y areglo: Antoni Gario).

 

E cuerpo di hurado no tabata tin un tarea facil. For di prefinal por a mira cu e competencia lo ta uno fuerte entre e 26 Soca y 11 Caiso original cu a clasifica. E bandanan cu a participa na e anochi final di Aruba Caiso & Soca Monarch 2018 ta (den sequencia di nan presentacion): Hot Ones Band, Caribbean Band, Zeta Band, N’Fuzion, Youth Xtreme, Madness Band, The Failures, Le Groove, STEAM, Tsunami, Mellow, D’-Licious y Le Groove cu un total di 32 cantante.

E di tres finalista den categoria di Caiso a resulta Richard “Mighty Tattoo” Quant cu e cancion “Den Mi Sonjo” (composicion: Richard Quant, areglo: Mark Maduro) y e di dos finalista ta Carl “Galloway” Roosberg cu “To Make My Country Proud”, cual e mes a composita y a aregla hunto cu Samuel Jack,

 

Den categoria Soca e di tres finalista ta Malaghy “Rasta” Richardson cu e cancion “For Once and For All”. E compositornan di e cancion aki ta Jonathan Thiel, Shaqeem Tomasia y Malaghy Richardson mes. E areglo tabata bao encargo di Dwight Leoneta y Dimitri Frans.

E premio pa Best Entertainer Costume a bai pa Tommy Lee “Black Ceramic” Halman y e banda miho uniforma di e anochi tabata Buleria. Stichting Musica ta agredicido na cada participante di e festival y ta consciente cu nan a haci un gran esfuerzo pa composita, aregla y ehecuta nan canticanan.

 

Otro aña Aruba su Carnaval ta celebra su di 65 aniversario. Pues, un carnaval cu lo wordo celebra den grandi na Aruba y den bista di mundo henter. Aruba su Caiso y Soca music ta un parti esencial cu ta haci nos carnaval unico y pa e motibo aki Stichting Musica kier encurasha cada participante y banda pa cuminsa prepara desde trempan pa asina sigi contribui na e fiesta cultural di mas grandi na Aruba.

 

E meta y gran deseo di Stichting Musica ta pa producionnan di Aruba Caiso & Soca Monarch por yega riba mercado internacional. Na mes momento e organisacion ta boga pa un union aun mas fuerte y genuino entre e musiconan. Un suplica ta bai na cada banda, pa manda sikiera un representante pa asisti na e reunionnan di Stichting Musica.

Durante di e anochi final di Aruba Caiso & Soca Monarch tres persona a ricibi un homenahe special, cual ta sr. Juby Naar, sr. Antonio Mingo y sr. Ed Spruit. Cada un di nan a ricibi e elogio aki pa nan contribucion inmenso na e musica di Caiso & Soca aki na Aruba y internacionalmente.

Leave a Reply

Top