Arubiano gara cu un cantidad di droga riba lama grandi

Awe e website 24ora.com a bini cu un noticia exclusivo di aresto di un Arubiano den cercania di Canada, abordo di un velero, y cu un cantidad grandi di droga.

Segun e informe di e website aki, e velero cu dos persona abordo, entre otro e Arubiano, a sali for di Republica Dominicano, na inicio di december rumbo pa Canada pa entrega e nave aki, aparentemente na su doño.

Loke cu a hala atencion di autoridadnan ta e hecho cu e personanan aki ta biaha abordo di un velero den un temporada asina friu, y ya caba algun siman prome a gara un velero cual tambe tabata transporta droga.

E Arubiano abordo tabata Mario Giorgino (Gino) Arendsz, kende na sigur un ocasion a bay cera y a keda condena den un caso grandi di atraco riba banco.

El a wordo condena pa e hecho di a suministra e armanan (pisa) na e atracadornan. E lo tabata envolvi den un otro caso mas, pero no ta conoci si el a bay dilanti.
E prome detencion a cay como un sla duro pa e habitantenan di su bario, Savaneta, ya cu e tabata wordo mira como un idolo, un landado y buceado admira.

E informe ta bisa cu el a wordo deteni dia 19 di december door di Guarda Costa Mericano na costa di Maine, cerca di Canada. E informe a keda publica den Journal de Montreal. Nan ta bisa cu a haya rond di 750 kilo di cocaina den e Velero cu mester a bay mara na Quebec y lo mester tin un balor di 37 miyon dollar

E ultimo parti di e informe cu 24ora.com a publica ta masha interesante. E homber Arubiano aki a bandona Aruba dia 22 di october ultimo rumbo pa Santo Domingo y “Remarcabel ta cu riba e mesun vuelo a sali 1 hende muhe y 4 hende homber mas, mayoria Hulandes/Europeo, cu tampoco no a regresa nos isla mas.”
Poco tempo atras tabatin otro dos Arubiano cu a wordo deteni na Merca cu droga, pero eseynan tabata cu un cantidad masha chikito compara cu e cargamento aki. Transporte asina grandi ta mustra cu mester tin un organisacion masha grandi su tras.

Leave a Reply

Top