Atracadornan a wordo priminti mey kilo di oro

Diabierna ultimo tabatin un caso interesante den Corte unda cu a trata e caso contra un grupo cu tabata envolvi den dos atraco grandi na Aruba. Uno riba Gems y otro La Estrella. Entre e dos negoshinan aki e atracadonan a bay cu casi 1 miyon florin na joyas.

Tabata trata di un grupo di 8 persona di cual esnan cu a comete e asalto mester tabata stranhero y ta wordo bisa cu nan a wordo treci Aruba cu e meta aki, comete atraco y bay bek nan pais. Pero door cu un of mas a cuminsa gasta placa pa loco, e bista a cay riba nan.

Un di e acusadonan cu a participa den e atraco riba Gems a bisa cu el a wordo priminti basta placa, pero e organisadonan finalmente no a cumpli cun’e. E promesa tabata cu cada un lo haya l a haya 10 mil florin. Pero el a haya prome 1000 y despues 1500 dollar. Esaki for di un negoshi unda cu a bay cu casi 6 kilo di oro (na joyas).Tambe el a haya algun cadena, cu e tabatin pensa pa hiba pa su yiunan.

Despues di esey, el a wordo aserca pa un muhe pa comete otro atraco, pero riba La Estrella. Miedo a coy su curpa y no tabata kier a participa directametne, solamente como observador, esta den e auto di transporte.

Den e atraco cometi riba La Estrella a bay cu casi 500 mil florin na joyas. Den esaki e palabracion tabata cu cada participante, sin importa e rol cu cada un a hunga, lo a haya mey kilo di oro. Mei kilo di oro ta hopi pasobra oro ta wordo bendi pa ons.

Di tur loke a wordo horta, masha poco a wordo recupera. Y algun di e atracadornan a gasta parti di e placa cu nan a haya di e prome atraco tambe. Dificil cu e victimanan por saca algo di nan bek, apesar cu nan lo trata di hacie.

 

Aki dos siman lo tin sentencia pa e grupo aki, cu castigonan di entre 1 y 9 aña a wordo exigi.

 

 

Leave a Reply

Top