Aventura kriminal ‘Toko’ di Wiels den komishon di refineria a kosta 16.8 mion florin

WILLEMSTAD – Danki na e hecho ku e parlamentario  Marelyn Moses a hasi pregunta riba e Komishon Multidisplinario ku mester a traha riba un alternativa pa kontinuidat di nos refineria, ku a bin sali na kla ku presidente dje komishon a kima 16,8 mion florin pa produsi ‘nul’, ‘zilch’ nada na resultado.

 

Esei a sali na kla for di e kontestanan ku promé minister Rhuggenaath a manda pa señora Mozes i kaminda un biaha mas e komishon ku nan a nombra tempu ku Soberano tabata den gobiernu ku Ben Whiteman na kabes di koalishon, mester a favoresé ‘famia i amigu’, i a duna e ruman di Helmin Wiels e komishon pa ‘hunga’ kune i ku a kosta miones.

 

Mientras tantu Werner Wiels mes a disparsé pa predionan lehano igual ku su kompañero di alma soberano Ben Whiteman kendenan no por haña ni ku kachó di difuntu Joe Pinedo.

Señora Mozes a manda punra Rhuggenaath ki dia Gobiernu ta dispuesto  pa dialogá ku parlamento riba e asuntu di GZE, Pdvsa i refineria i Rhuggenaath a kontesta ku dia 13 di november nan tabatin invitashon pa asisti na un  reunion 7 november pa atende e topiko aki.

 

Durante e reunion di komishon sentral ultimo di dia 13 di november gobiernu a duna  amplio informashon riba e plan B  ku a traha for di mei ultimo si akaso no ta sigi ku e refineria i mester buska otro destino pe terenonan aki,.

Hopi tristu ta di tende ku despues di a hinka 16.8mion florin den e komishon di Wiels ku no tin mas kompania envolvi den e plan B ku gobiernu a menshona.

 

Luna pasá señora Mozes a hasi e pregunta pero si ela hasi nan ayera, e no lo por a tuma nota ku su èks lider politiko Alex Rosaria a manda e informashon devastador ku Guangdon Zhenrong a frakasá na otro pais di Lehano Oriente loke no ta pinta masha alentador pa nan bira aktivo na Korsou.

Ta duele di bisa pero Guangdon a pega e komishon tremendo pakete ku nan promesanan manera Pakete Chileno pero mester tene na kuenta ku Ben Whiteman a kore bende votadónan un ‘dooie mus’ promé ku elekshon pa purba skapa e partido pero no tabatin eksito.

 

Ku e notisia ku Alex Rosaria a manda ayera den espasio, por bien sera e kapitulo di Guangdon i konsentrá nos tinu riba King Kong, asina tristu e asuntu aki ta.

Riba e pregunta si por duna sifra kuantu hende lo a haña trabou den e proyekto di Guangdon, minister Rhuggenaath a keda debe e kontesta, asina parotin e proyekto a keda prepará.

A ni bista gobiernu no tin riba futuro suministro di krudo di PDVSA pasobra mandatarionan no ta sigi loke ta pasa na Venezuela pa realisá ku Venezuela no tin produkshon ni pa nan mes te pa nan ta bai tin krudo pa Korsou.

 

Awor aki tur hende ta bèt riba Curoil pa nos tin gas i gasolin den futuro ku nan negoshinan internashonal.

Otro faktor negativo ta ku tur trabou ku Feffik i University of Curacao a hasi den preparashon pa Guangdon kuminsa funshoná, ta tirá afó.

 

 

Top