Barco cu a sali di Aruba haya cu 1600 kilo di cocaina

Un barco cu diesdos (12) tripulante di diferente nacionalidad, procedente di Aruba, y cu 1600 kilo di cocaina, a wordo intercepta diadomingo den oranan di atardi riba lama grandi, den un operativo conhunto di unidadnan nacional di Guarda Costa Mericano, Hulandes, Armada di Republica Dominicana y Direccion Nacional di Control di Droga, a wordo informa diamars door di autoridadnan concerni.

E barco, autoridadnan Dominicano ta bisa e ta matricula na Aruba y Marina Hulandes ta bisa e ta registra na Tanzania, ta wordo capitanea pa José Antonio Quijada Salazar, Venezolano, a yega haf di San Souci pa 4:40 di atardi, escolta pa Guarda Costa Mericano, ARD y Oficialnan di DNCD. Ta trata aparentemente di un tanker.

Un informe cu e organisacion Dominicano a emiti ta bisa cu e barco a sali di y tabata bayendo Puerto Plata, y despues di un listramento den presencia di Ministerio Publico, a haya 1502 paki scondi den saconan, y cualnan a pisa 1600 kilo (cocaina).

E agencia DNCD a informa cu e confiscacion di e 1600 kilo a tuma luga cu e apoya di diferente agencia manera ARD, y bou coordinacion di Ministerio Publico. Ta parce cu e agencianan aki hunto cu paisnan aliado a bin ta siguiendo un barco di perfil halto sospechoso cu a wordo intercepta door di unidadnan maritimo di Hulanda y Merca den awanan internacional y cu despues a wordo escolta bou di medidanan di siguridad estricto door di miembronan di Armada Dominicano pa haf di Sans Soucí na Santo Domingo.

A tuma e agencianan 48 ora sigui di buskeda y pa saca e droga scondi den e parti paden di e barco, cu a keda confisca.

Den e operacion aki a detene 12 miembro di e tripulacion, entre otro Colombiano, Venezolano, Cubano, Nicaragüense, Hondureño y Dominicano.

E investigacion ta sigui, segun autoridadnan Dominicano, pa detene otro miembronan di e red di trafico ilegal di droga.

Marina Hulandes ta bisa cu e barco ta nabega bou di bandera Tanzanes y tabata bayendo Republica Dominicana. Esaki tabata e di dos confiscacion grandi den dos siman di tempo. Dia 22 di december  Van Speijk a gara un Go Fast cu 550 Kilo di cocaina abordo.

E helicopter NH-90 a señala e barco sospechoso riba Pasco. Nan a sigui’e durante oranan di anochi y e siguiente mainta e “boardingteam” di Guarda Costa Mericano a subi e barco. Ora cu e prome buskeda no a duna resultado, a dicidi di escolta e barco pa Santo Domingo. Aña nobo a bin descubri e baldenan cu tabata sconde den un espacio entre e tankinan di combustibel.

Mester bisa cu e Arubiano cu a wordo aresta riba velero cu 750 kilo di cocaina, a sali for di Santo Domingo cu e cargamento grandi ey.

Leave a Reply

Top