Bon trabou di Gobièrno contra negoshi ilegal di animal

KRALENDIJK – Diferente servicio di Gobièrno a haña animal- y matanan cu ta protehá bibo y morto y nan productonan (manera cráneo-, medicinanan, carni), den maleta di pasaheronan, den fleta, den paketenan di pòst y riba marshenan.

Tur ta trata di animal- y matanan cu ta protehá pa Tratado di CITES. Ministerio di Agricultura, Naturalesa y Calidad di Alimento, Voedsel- en Warenautoriteit Hulandes y Rijksdienst voor Ondernemend Nederland, Aduana, Ministerio Público y Polis den e periodo di 1 di sèptèmber te 5 di novèmber 2017 a actua mutuo contra negoshi ilegal den mata- y animalnan protehá.

E accion tabata dirigí riba contròl y dunamento di informacion. E actividadnan a tuma lugar den haf di Rotterdam, na Aeropuerto Schiphol, na Hulanda Caribense, na casnan particular, den negoshi- y riba marshenan.

 

Internacionalmente ta combatí transporte ilegal di mata y animal. Mas di 180 pais a haci palabracion mutuo tocante bendemento, transporte, coleccion òf crio di mata y bestia protehá. E palabracionnan aki ta poné den e tratado di CITES.

CITES ta pará pa Convention on International Trade in Endangered Species of Wild Fauna and Flora cu tin como meta pa prevení cu un especie ta extinguí òf ta baha drásticamente den cantidad.

P’esey Union Europeo a publicá e asina yamá ‘Action Plan against Wildlife Trafficking 2016-2020’ cu cua Hulanda tambe a comprometé su mes.

Accion mutuo (Operacion Pangolin) ta bin riba e accionnan regular cu ta sigui tuma lugar durante henter aña. E añanan benidero tambe lo tin accionnan dirigí.

 

PATANAN DI UN OLIFANTI

En total e controlnan a producí 59 caso den cua a confiscá productonan. Den pòst a topa cu diferente pakete cu scama di e animal Africano Pangolin cu ta bou di menasa di extincion hopi serio, cu tabata na caminda di Africa pa Asia via Hulanda (total 77 kilo).

Na Schiphol a haña un pasahero cu 14.000 cabai di awa morto den maleta biahando pa China. Entretanto e pasahero akí a keda condená na un castigo di prizòn di 6 luna di cua 3 luna condicional y un tempo di prueba di dos aña.

 

Tambe a confiscá diferente orquidia, un cantidad di producto di tiponan di palo protehá y 40 kilo di puiru di palo di colebra.

E inspectornan a haña tambe medicinanan cu ingredientenan di oso, un cueru di un oso polar, un cantidad di parha bibo y 120 pisca ‘arapaima’.

Ademas a topa cu animalnan balsamá e.o. shoco y un ‘cobra’. Mas aleu e inspectornan a topa cu cráneonan di macaco y krokodel, 7 cuero di animal òf partinan di esakinan di e.o. un panter, diez transporte di coral bibo, un casca di turtuga bèrdè, tres pata di un olifanti Africano y 6 barbulètè. Tabata transportá tur e cosnan akí ilegal y a confiscá nan.

 

BONAIRE

Duana na Bonaire a confiscá den e periodo di accion 267 kilo di carcó. Nan tabata na caminda di Venezuela pa Bonaire. Ademas a confiscá diferente pida coral y cocolishi den ekipahe di turistanan na aeropuerto.

 

MARSHE DI PARHA

Na un marshe di parha na Zwolle a topa diferente parha serca bendedornan di parha cu no tabatin nan documentonan na òrdo òf di cua e renchinan di pata no tabata cuadra.

A confiscá e parhanan entre nan ‘wijnborstamazone’ (un tipo di lora) y un cantidad di e parha ‘hop’ yamá. E dos sospechonan a paga un boet di 5000 euro.

A hiba tur e parhanan cu a confiscá bibo pa RVO.

 

SONDEO RÁPIDO

Pa saca afó si CITES ta conocí bou di habitantenan di Hulanda, a haci un sondeo representativo. Gran mayoria di esnan cu a puntra (94%) ta duna di conocé cu nan sa cu no ta permití pa haci negoshi cu, coleccioná òf cria mata- y animalnan protehá internacionalmente.

Alrededor di 63% sa cua reglanan tin y 1% a mencioná CITES spontáneo. Di esnan di 70 aña y mas 30% conocé e tratado CITES pa nòmber y bou di esnan di 15 te cu 25 aña esaki ta 16%.

 

 

Leave a Reply

Top