Bonaire a acepta buelonan di Aruba Airlines cu brasa habri – Aruba Airlines lo ta un bon aliado pa pueblo di Bonaire haya buelonan na tarifanan economico

Awe mainta, Aruba Airlines tabatin su buelo inaugural pa Bonaire, cu como invitado e.o. Minister Chris Romero, maske cu Minister di Turismo, Dangui Oduber tambe tabata invita, pero na ultimo ora a cancela, debi na otro compromisonan.

Prensa y otro invitado di parti di gerencia di Aruba Airlines tabata abordo pa Bonaire.

 

Despues di un buelo di como 29 minut, na Aeropuerto Flamingo tabatin un delegacion di Gobierno di Bonaire pa yama bon-bini n’e delegacion di Aruba Airlines, representa pa su ehecutivonan, CEO, Frank Arendsz, Esteban Valles, Presidente di Aruba Airlines.

Presente riba plataforma tabata Gezaghebber, Edison Rijna, Diputadonan, Hubert Martis, James Kroon y Edsel Cecilia. Tambe presente tabata Maurice Adriaans, Director di TCB.

 

Por a sinti den e bon bini aki, cu tin masha aprecio pa Aruba Airlines, como un necesidad pa Bonaire. Bonaire a recibi Aruba Airlines cu brasa habri y durante e conferencia di prensa na Rincon, esaki a keda participa tambe. Sigur pa loke t’e tarifa cu Aruba Airlines ta ofrece na pueblo di Bonaire cu ta sigur 50% mas barata cu e otro compania cu ta bula tambe pa Bonaire.

 

Unabes cu a habri e conferencia di prensa, Frank Arends, CEO di Aruba Airlines a tene un minuut di silencio pa loke cu a pasa na Aruba, unda dos mucha a keda asesina. Despues a sigui conferencia di prensa unda e CEO di Aruba Airlines a anuncia e schedule di buelo pa Bonaire, pero cu pueblo di Bonaire via di Seguro di Cuido BES (ZVK) tin acuerdo caba pa manda pacientenan di Bonaire pa cuido medico na Aruba.

Porcierto dia 1 di januari proximo, mr. Angel Bermudez, ex Minister na Aruba lo bira e Hefe nobo di ZVK, loke sigur ta un bon noticia.

A felicita tambe TCB, cu dia 24 ultimo a celebra cu 50 aña pasa, Bonaire a recibi su prome crucero, y como tal Aruba Airlines sigur lo bula mas cu 50 aña pa duna servicio na Bonaire.

 

Minister Chris Romero tambe ta masha contento cu e buelo inaugural aki, ya cu Aruba Airlines sigur lo contribui pa trece e pueblonan aki mas serca di otro. Por a sinti esaki tambe, ora cu ya caba tin peticion pa si e pasaheronan por bula pa Aruba, y haci conexion pa bula pa Miami, na un tarifa mas barata.

Entrante awe lo bira nan prome buelo comercial cu porcierto tin cu bista un buelo completamente yen, segun Hefe di Benta, Jessica Dirksz. Esaki ta haci Aruba Airlines sumamente contento.

E buelonan pa Bonaire lo ta 4 biaha pa siman, cualnan ta diamars, diahuebs, diasabra y diadomingo. Saliendo for di Aruba 11’or y 45 di mainta y for di Bonaire 2’or di merdia.
Riba diadomingo tin un buelo directo Aruba-Bonaire, pero ora di bin bek ta pasa Corsou, no ta baha for di avion y ta sigui pa Aruba.

 

Leave a Reply

Top