Booshi Wever di UPP kier sa – Kico lo bay prevalece den e lunanan benidero: Intimidacion of bon gobernacion

“Nos ta den un momento cu historia lo posiblemente lo bay categorisa como trancendental pa nos pais, pa nos democracia y tambe pa nos identidad politico. Den luna di augustus lo bay tuma lugar dos evenemento importante.

Na prome lugar lo bay tin un debate den Parlamento riba funcionamento di Serlimar y e maneho cu Gobierno y e Minister di Medio-Ambiente lo kier bay ehecuta al respecto.

Na di dos lugar Gobierno lo mester presenta Parlamento cu e presupuesto di 2019 y obviamente tur wowo, particularmente di Hulanda, lo bay ta dirigi pa evalua si Gobierno a cumpli cu e condicionnan impone pa Gobierno di Reino pa reduci gastonan y nos pueblo lo ta tambe curioso pa sa si tin mas medida na caminda”, segun Candelario (Booshi) Wever.

 

E preludio pa loke lo bay acontece na Parlamento den e luna di augustus NO ta mustra di lo bay ta di un forma profesional. Ya caba nos por a tuma nota den medionan di comunicacion e comentarionan y particularmente e atakenan personal cu e diferente miembronan di e partidonan politico cu representacion den Parlamento ta dirigi na otro.

No ta intencion parce pa discuti riba un tema specifico, pero mas bien e intencion ta pa desacredita e persona (kill the mesenger to kill the message).

E situacion sinembargo a bira mucho mas alarmante ora nos tuma nota di comentarionan cu Minister-Presidente y e Minister encarga cu Medio-Ambiente ta haci respecto e recogemento y procesamento di desperdicio.

 

Segun Booshi Wever, publicamente e dos mandatarionan ta duna di conoce cu Parlamento mester sea baha cabes y acepta e regla y condicionnan  impone p’e Minister di Medio-Ambiente of mester atene nan mes n’e consecuencianan di un posibel decisionnan controversial pa cu e maneho di e Minister.

Minister di Medio-Ambiente, Otmar Oduber a bay asina leu di intimida Parlamento cu su declaracion di: “Laga e cero di Parkietenbos sigui subi numa”, si encaso esey t’e deseo di Parlamento y pio ainda a alerta cu lo mester carga e consecuencia p’e contractnan cu ya caba a wordo cera.

Contractnan miyonario cu sponsornan y sin ningun tipo di destaho publico y cu ta totalmente inecesario.

 

Pa colmo Minister Otmar Oduber a duna instrucionnan na Serlimar pa evalua un tarifa nobo pa recogemento di desperdicio. Kico esaki nifica? Ta ken ta manda defacto e ora na Serlimar, e Minister of e Hunta di Supervision y e Directornan?

Y e instruccion aki di e Minister ta un knock-out directo p’e sindicatonan cu a dialoga cu e Minister manera FTA como tambe sindicato manera STA cu a apoya e Minister 100%.

E Minister a duna atrobe muestra di menosprecio, pasobra su unico intencion tabata pa “span nan voor zijn karretje” cu otro palabra manipula nan pa su propio beneficio y el a logra esey tambe. Awor aki e siguiente bataya lo bay tuma lugar na Parlamento, pasobra Gobierno ya el a logra hipnotisa nan cu su maniobra y manipulacionnan y e tin un pa un den su gara.

 

Segun Booshi Wever, e pregunta grandi ta awor, lo logra pa convence Parlamento cu e lollypop y sigui cu su pachanga of Parlamento lo bisé cu no t’e tarifa so t’e problema, pero tambe e racha di desicionnan contra tur regla di Bon Gobernacion?

Parlamento lo para p’e consecuencianan di e lucha noble pa Aruba realmente wordo goberna a base di e reglanan di Bon Gobernacion?

Si no para p’esaki anto un biaha mas nos lo bay haya un show espectacular den Parlamento aki poco dia y un biaha mas pueblo lo wordo masacra cu e “KARTELHEFFING” y e Parlamento lo retene su titulo di “Stempelparlement”!!

 

 

Leave a Reply

Top