Caso Wayaca den Corte diahuebs mainta

Informacion cu AWEMainta a ricibi ta bisa cu awe, diahuebs, Corte di Prome Instancia ta trata e caso di asesinato di Wayaca. Asina ta poni riba rol.

Pero ta parce cu un biaha mas e caso ta bay wordo posponi debi na problema cu defense cu un di e dos acusadonan a haya su mes confronta cun’e. Si esey sosode, e lo bira e di cuatro biaha cu e caso ta wordo poni riba rol y no ta wordo trata. E ultimo biaha tabata den luna di october. E prome biaha e acusadonan a bin Corte den luna di april y juni, y mester a pospone e caso pa motibo cu documentonan relaciona cu e caso, y informacionnan importante cu no tabata cla ainda.

Segun AWEMainta por a compronde, e acusado Po S.F. no a logra soluciona e problemanan administrativo cu e tabatin cu su Abogado di Hulanda mr. Spong. Esaki ta nifica cu e mester busca un otro abogado, y aparentemente e no a logra haya uno cu e kier of e nobo mester di mas tempo pa studia su caso. Hecho ta cu tur cos ta mustra cu e tratamento di e caso di e asesinato di un comerciante Chines na Wayaca no ta sigui.

E ultimo biaha cu e caso a bini riba rol, e otro acusado Jefferson P.E. tabata basta rabia, pasobra e no ta di acuerdo cu cada biaha e caso ta wordo posponi. El a bisa Hues na e ocasion ey, cu pa e siguiente fecha si e kier pa su caso wordo trata. E ta wordo asisti pa Abogado mr. Carlo.

E dosnan aki ta wordo cu conhuntamente cu un otro of otronan, a kita bida di un persona riba 13 di september 2016, dor di los un of mas tiro riba e victima femenino, a consecuencia di cual el a fayece, pero tambe nan ta wordo acusa subsidiariamente di ladronicia cu violencia di un suma di placa, un cadena, telefonnan y un auto.

Leave a Reply

Top