CBS: Crecemento di movecion aéreo den e di dos kwartal

KRALENDIJK – Den e di dos kwartal avionnan a bula 5.190 bes bay bin pa Hulanda Caribense. Compará cu e di dos kwartal di 2016 esaki ta un aumento di 5,7%. Tanto na Bonaire como na Sint Eustatius e cantidad di buelonan a subi.

Na Bonaire e aumento tabata 7,6% y na Sint Eustatius 11,7%. Na Saba e cantidat di movecion di avion a baha cu 11,7%.

 

E aeropuerto di Bonaire, cu 2.980 movecion di avion, t’e aeropuerto number 1 cu movecion di Hulanda Caribense. Sint Eustatius ta number 2 cu 1.520 movecion den e di dos kwartal. Saba ta esun mas chikito cu 680 movecion di avion.

 

BAHADA PA Y FOR DI BONAIRE

E cantidad di movecion aéreo a aumentá, pero e cantidad di pasahero cu a bula bay bin pa Hulanda Caribense, a baha den e di dos kwartal cu 4,9%.

Na Bonaire e cantidad di pasahero cu a yega y sali a baha cu 7,1%, na Saba 1,1%. Na Sint Eustatius e cantidad di pasahero cu a atendé a subi cu 5,2%.

 

En total 76,6 mil pasahero a bula pa Bonaire bay bin den e di dos kwartal. Mayoria pasahero (50%) tabatin Còrsou como orígen òf destinacion directo. Amsterdam tabata na di dos lugar cu 24%.

E balor di mercancianan importá pa Hulanda Caribense cu avion tabata den e di dos kwartal 6,5 mion dòlar Mericano.

Compará cu un aña anterior esaki tabata nificá un aumento di casi 39%.

Top